निर्वाचनको वातावरण बनाउन सरकार र आयोग जिम्मेवार : उपसभापति भुसाल

काठमाडौं । नेपाली काँग्रेसकी उपसभापति पुष्पा भुसालले निर्वाचनका लागि आवश्यक वातावरण बनाउने जिम्मेवारी सरकार र निर्वाचन आयोगको भएको बताउनुभएको छ।

मंगलबार काठमाडौंमा आयोजित निर्वाचनसम्बन्धी विज्ञहरूसँगको संवाद कार्यक्रममा बोल्दै उहाँले राजनीतिक दलहरू भने निर्वाचनको मैदानमा प्रवेश गरिसकेको स्पष्ट पार्नुभयो। उहाँका अनुसार दलहरूले उम्मेदवार तय गरिसकेका छन् र प्रचारप्रसारसमेत तीव्र बनाइसकेका छन्।

उपसभापति भुसालले निर्वाचनलाई स्वच्छ, निष्पक्ष र व्यवस्थित बनाउन आवश्यक संरचना तथा वातावरण निर्माण गर्ने दायित्व सरकार र निर्वाचन आयोगको भएको उल्लेख गर्नुभयो। उहाँले विगतका निर्वाचन अनुभवका आधारमा उम्मेदवारहरूले पनि राज्यका निकायबाट उचित तयारीको अपेक्षा गर्ने बताउनुभयो।

संविधान संशोधनको विषयमा बोल्दै उहाँले यो निरन्तर संवादको प्रक्रिया भएको र समयको आवश्यकताअनुसार संशोधन हुने बताउनुभयो। नयाँ बन्ने संसद्ले संविधान संशोधनको जिम्मेवारी लिने उहाँको भनाइ थियो।

उपसभापति भुसालले नेपाली काँग्रेसले निर्वाचनका लागि घोषणा–पत्र तयारीको काम अन्तिम चरणमा पुर्‍याइसकेको पनि जानकारी दिनुभयो।