चाडपर्व नजिकिँदै गर्दा सहुलियत दरमा चामल बिक्री

गोरखा । खाद्य व्यवस्था तथा व्यापार कम्पनी लिमिटेड गोरखा शाखाले नजिकिँदै गरेको चाडपर्वलाई लक्षित गरी सहुलियत दरमा चामल बिक्री गर्न सुरु गरेको छ । दसैँतिहारलाई लक्षित गरी शाखाले चामलमा साविकभन्दा रु पाँच मूल्य घटाएर सहुलियत मूल्यमा चामल बिक्री गर्न थालेको खाद्य व्यवस्था कार्यालयकी प्रमुख रञ्जना केसीले बताइन् ।

कार्यालयको वार्षिक उत्सवका अवसरमा साउन २८ गतेदेखि सहुलियतको चामल बिक्री सुरु गरेको उनले जानकारी दिइन् । उनका अनुसार कार्यालयबाट स्टिम जिरा मसिनो र अरुवा सोना मन्सुली चामल छुट मूल्यमा बिक्री हुँदै आएको छ । यस वर्षका लागि कार्यालयको गोरखा शाखामा ३८० क्विन्टल, सिर्दिबास डिपोका लागि १९० क्विन्टल तथा बिक्री केन्द्र नामरुङ र चुमलिङका लागि पनि १९० क्विन्टल चामल छुट मूल्यमा बिक्री गर्न कोटा निर्धारण भएको थियो ।

सोअन्तर्गत शाखा कार्यालय गोरखाबाट अरुवा सोना मन्सुली चामल प्रतिकिलो रु ६२ बाट घटाएर रु ५७ मा बिक्री भइरहेको छ । स्टिम जिरा मसिनो चामल प्रतिकिलो रु ९२ बाट घटाएर रु ८७ का दरले बिक्री भइरहेको कार्यालय प्रमुख केसीले जानकारी दिइन् ।

खाद्यको सिर्दिवास डिपो तथा बिक्री केन्द्र नामरुङ र चुमलिङबाट भने अरुवा सोना मन्सुली चामल प्रतिकिलो रु ६५ बाट घटाएर रु ६० र स्टिम जिरा मसिनो चामल प्रतिकिलो रु ९५ बाट घटाएर रु ९० का दरले बिक्री भइरहेको कार्यालय प्रमुख केसीले बताइन् । उनका अनुसार छुट कोटाको मौज्दात नसकिएसम्म बिक्री केन्द्रबाट सहुलियतको चामल उपलब्ध हुनेछ । छुट कोटाको मौज्दात सकिएपछि भने पुरानै दरमा चामल खरिद–बिक्री हुनेछ ।

“छुट कोटामा २५ किलो बोराको अरुवा सोना मन्सुली चामल गोरखामा प्रतिबोरा रु एक हजार ४२५ र सिर्दिवासमा प्रतिबोरा रु एक हजार ५०० तथा स्टिम जिरा मसिनो चामल गोरखामा प्रतिबोरा रु दुई हजार १७५ र सिर्दिवासमा प्रतिबोरा रु दुई हजार २५० मा बिक्री गरिरहेका छौँ”, उनले भनिन्, “छुट कोटा सकिएपछि प्रतिकेजी पाँच रुपैयाँ बढी तिरेर बजार मूल्यभन्दा सस्तोमा नै चामल बिक्री–वितरण हुन्छ ।”

दसैँ, तिहारलाई लक्षित गरेर कार्यालयले चिनी, दाल, तेल र गेडागुडीसमेत बिक्री गर्न लागेको कार्यालय प्रमुख रञ्जना केसीले जानकारी दिइन् । “केही दिनभित्र चिनीलगायत अन्य खाद्यान्न बिक्री गर्न सुरु गर्छौँ । चिनी प्रतिकिलो रु ११० मा उपलब्ध हुन्छ”, उनले भनिन् ।

चालु आर्थिक वर्ष २०८३/८४ का लागि खाद्यको सिर्दिवास डिपो, नामरुङ बिक्री केन्द्र तथा चुम्लिङ बिक्री केन्द्रका लागि एक–एक हजार क्विन्टल चामलको कोटा निर्धारण भएको छ । शाखा कार्यालय गोरखाका लागि भने आवश्यकताअनुसार चामल ढुवानी हुने बताइएको छ । कार्यालयको सिर्दिवास डिपोमा हाल ७०० क्विन्टल चामल मौज्दात रहेको खाद्य व्यवस्था तथा व्यापार कम्पनी लिमिटेड गोरखा शाखाले जनाएको छ ।