घुस प्रकरणमा टेलिकमका पूर्वप्रबन्ध निर्देशक पौडेललाई ८ वर्ष कैद

काठमाडौं । विशेष अदालतले नेपाल टेलिकमका पूर्वप्रबन्ध निर्देशक सुनिल पौडेललाई घुस लिएको आरोपमा आठ वर्ष कैद सजाय सुनाएको छ ।

विशेष अदालतका अध्यक्ष सुदर्शनदेव भट्ट तथा सदस्यहरू हेमन्त रावल र डिल्लीरत्न श्रेष्ठको इजलासले व्यवसायी दीपक आनन्दसँग घुस मागेको आरोपमा पौडेललाई आठ वर्ष कैद सजाय तोकेको हो ।

विशेष अदालतले घुस दिएको आरोप लागेका व्यवसायी दीपक आनन्दलाई समेत आठ वर्ष कैद सजाय सुनाएको छ ।

यस्तै, नेपाल सरकारको विशिष्ट तहको पदमा रहेर भ्रष्टाचार गरेको ठहर गर्दै पौडेललाई थप ६ महिना कैद सजाय तोकिएको छ ।

विशेष अदालतले रकम बरामद नभएको आधारमा उनीहरूमाथि बिगो कायम गरेको छैन । तर घुस लिएको भनिएको ३ करोड ८ लाख रुपैयाँलाई दामासाहीमा बाँडेर दुवै जनालाई १ करोड ५४ लाख रुपैयाँका दरले जरिवाना गर्ने फैसला गरेको छ ।