पूर्व एमाले सदस्य सुजन पौडेल कांग्रेस उम्मेदवारको पक्षमा

काठमाडौं । नेकपा एमालेका पूर्व जिल्ला सदस्य सुजन पौडेल (रमेश बाहुन)ले फागुन २१ गते हुने प्रतिनिधिसभा निर्वाचनमा नेपाली काँग्रेस **रामचन्द्र खड्का**लाई सघाउने घोषणा गरेका छन्।

शनिबार लिखु तामाकोशी गाउँपालिकामा आयोजित कांग्रेसको चुनावी कार्यक्रम तथा घरदैलो अभियानमा पौडेलले उम्मेदवार खड्काको पक्षमा मत माग्दै सहभागिता जनाए। उनले रामेछापमा खड्काको विजयका लागि आफ्नो पूर्ण सहयोग रहने प्रतिबद्धता व्यक्त गरेका छन्।

वि.सं. २०६४ सालमा एमाले अध्यक्ष **केपी शर्मा ओली**को हातबाट पार्टी सदस्यता लिएका पौडेल तत्कालै जिल्ला समिति सदस्य पदमा मनोनित भएका थिए। केही समय एमालेमा सक्रिय राजनीति गरे पनि पछिल्लो समय उनी वैदेशिक व्यवसायमा सक्रिय थिए।

रामेछाप काँग्रेसले पौडेल र उनको टिमको समर्थनले आगामी निर्वाचनमा थप सहजता हुने जनाएको छ। यस घटनाले रामेछापको राजनीतिक समीकरणमा नयाँ चर्चा सुरु गरेको छ।