काठमाडौं । नेकपा एमाले ले प्रतिनिधि सभा निर्वाचन २०८२ का लागि आफ्नो चुनावी घोषणापत्र सार्वजनिक गरेको छ । पार्टी अध्यक्ष केपी शर्मा ओली ले काठमाडौं मा आयोजित कार्यक्रममा घोषणापत्र सार्वजनिक गर्नुभएको हो ।
घोषणापत्रमा एमालेले अघिल्लो कार्यकालमा गरेको र आगामी दिनमा गर्ने योजनाहरूको विस्तृत फेहरिस्त प्रस्तुत गरिएको छ । पार्टीले लोडसेडिङ अन्त्य, अन्तर्राष्ट्रिय विमानस्थल निर्माण तथा पूर्वाधार विकासका विभिन्न परियोजना आफू नेतृत्वको सरकारले सम्पन्न गरेको दाबी गरेको छ ।
एमालेले आगामी कार्यकालका लागि तत्काल गर्ने ११ काम, ५ आधारभूत घोषणा र समृद्धिका २५ स्तम्भ लाई मुख्य प्राथमिकतामा राखेको जनाएको छ । रोजगारी सिर्जना, आर्थिक विकास, पूर्वाधार विस्तार, सुशासन र प्रविधि विस्तारलाई घोषणापत्रको केन्द्रमा राखिएको उल्लेख छ ।
यसैबीच, जेनजी आन्दोलनका क्रममा आगजनी तथा क्षति पुगेका राज्यका संरचनाहरू पुनः निर्माण गर्ने काम समयसीमा तोकेर अघि बढाइने एमालेले जनाएको छ । यसमा सिंहदरबार र सर्वोच्च अदालत लगायत संरचना पुनः निर्माण गर्ने योजना समावेश गरिएको छ ।
घोषणापत्रमा एमालेले निर्वाचनलाई नीतिगत र वैचारिक प्रतिस्पर्धाको रूपमा प्रस्तुत गरेको छ । घोषणापत्रमा भनिएको छ, ‘यो निर्वाचन पुस्तान्तरणको होइन, देश बनाउने र भत्काउने बीचको जनमत–संग्रह हो । यो राष्ट्रघात र स्वाभिमान बीचको संघर्ष हो ।’
एमालेले घोषणापत्र कार्यान्वयनमार्फत तीव्र आर्थिक विकास र स्थायित्व सुनिश्चित गर्ने प्रतिबद्धता व्यक्त गर्दै आगामी निर्वाचनमा मतदातासँग समर्थन माग्ने रणनीति बनाएको जनाएको छ ।
हेर्नुहोस् एमालेको चुनावी घोषणापत्र–
फेसबुकबाट तपाईको प्रतिक्रिया