१० लाखसम्म आम्दानीमा कर नलगाउने घोषणा : नेपाली कांग्रेस को कर संरचना सुधार प्रतिबद्धता

काठमाडौं । नेपाली कांग्रेस ले आफ्नो सरकार बने वार्षिक १० लाख रुपैयाँसम्मको आम्दानीमा कर नलगाउने घोषणा गरेको छ ।

पार्टी सभापति गगन थापा ले ‘हाम्रो प्रतिज्ञा–तपाईंको प्रश्न’ नामक खुला बहस कार्यक्रममा यस्तो घोषणा गर्नुभएको हो । उहाँले नेपाल लाई विदेशी लगानीको आकर्षणको केन्द्र बनाउन भाषण मात्रै नभई नीतिगत सुधार आवश्यक रहेको बताउनुभयो । सोही उद्देश्यले १० लाखसम्मको आम्दानीमा कर नलगाइने नीति ल्याउने घोषणा गरिएको उहाँले स्पष्ट पार्नुभयो ।

थापाका अनुसार हाल व्यक्तिगत आयकर अधिकतम ३९ प्रतिशतसम्म रहेको व्यवस्था घटाएर अधिकतम २५ प्रतिशतमा झारिनेछ । यस्तै संस्थागत कर दरलाई २० प्रतिशतमा सीमित गर्ने योजना कांग्रेसले अघि सारेको छ । अन्य करका दरलाई समेत सरलीकरण गर्दै सबैलाई मूल्य अभिवृद्धि कर (भ्याट) प्रणालीमा समेट्ने योजना रहेको उहाँले जानकारी दिनुभयो ।

नेपालमा निजी क्षेत्रलाई सीमित व्यक्तिमा केन्द्रित गरेर हेर्ने प्रवृत्ति रहेको उल्लेख गर्दै उहाँले यस्तो सोच तोड्नुपर्ने आवश्यकता औंल्याउनुभयो । उहाँले भृकुटीमण्डप को चिया पसलदेखि मोबाइल र क्यामरा लिएर काम गर्ने युट्युबरहरू समेत निजी क्षेत्रकै हिस्सा भएको बताउनुभयो ।

कांग्रेसले सरकार बनेको तीन महिनाभित्र नीतिगत सुधारमा ठोस काम सुरु गर्ने प्रतिबद्धता समेत दोहोर्‍याएको छ ।