ओलीलाई मत हाल्न एमालेका ३० कारण सार्वजनिक

काठमाडौं ।ओलीलाई मत हाल्न एमालेका ३० कारण सार्वजनिक नेकपा एमाले ले अध्यक्ष केपी शर्मा ओली लाई मत हाल्नुपर्ने ३० वटा कारण सार्वजनिक गरेको छ । पार्टीको झापा क्षेत्र नं ५ क्षेत्रीय कमिटीले प्रकाशन गरेको अपिलमा राष्ट्रिय स्वाधीनताको रक्षा देखि शिक्षक दरबन्दी मिलानसम्मका विषय समेटिएका छन् ।

‘केपी शर्मा ओलीलाई नै भोट किन ?’ शीर्षकको अपिलमा खस्किएको मनोबल उठाउन ओलीलाई जिताउनुपर्ने उल्लेख गरिएको छ । देशमा छाएको त्रासको वातावरण अन्त्य गर्दै सबै नागरिकलाई शान्ति सुरक्षाको ग्यारेन्टी गर्न ओलीलाई मत दिनुपर्ने अपिलमा उल्लेख गरिएको छ । साथै झापा–५ मा सुरु गरिएका विकासका अधुरा योजनाहरू सम्पन्न गर्न ओलीलाई मत दिन आह्वान गरिएको छ ।

अपिलमा नवयुवालाई प्राविधिक शिक्षा उपलब्ध गराई सीपमूलक विकासमार्फत स्वरोजगार वृद्धि गर्न ओली आवश्यक रहेको उल्लेख गरिएको छ । सुस्ताएको अर्थतन्त्र चलायमान बनाउन, कृषिक्षेत्र विकास गरी खाद्यान्नमा आत्मनिर्भर बनाउन पनि ओलीलाई मतदान गर्न आग्रह गरिएको छ ।

निर्माणाधीन एसियन हाइवे, मध्यपहाडी राजमार्ग, मदन भण्डारी राजमार्ग र हुलाकी सडकको अधुरा निर्माण कार्य सम्पन्न गर्न पनि ओलीलाई मतदान गर्न आग्रह गरिएको छ । दमक–रवि–चिसापानी सडक निर्माण सम्पन्न गरी स्थानीय जीवनस्तर उकास्न पनि ओलीलाई निर्वाचित गर्नुपर्ने अपिलमा उल्लेख छ ।

त्यसैगरी नेपाल–चीन मैत्री औद्योगिक पार्क निर्माण सम्पन्न गर्न, दमक, गौरादह र गौरिगञ्ज बजारलाई स्मार्ट सिटीका रूपमा विकास गर्न ओली आवश्यक रहेको एमालेको भनाइ छ ।

भूमिहीन, दलित, सुकुम्बासी तथा अव्यवस्थित बसोबासीको समस्या समाधान, रतुवा, मावा र कमल खोलामा तटबन्धन, साथै स्थानीय अस्पतालमा सहज सेवा विस्तारका लागि पनि ओलीलाई मत दिन आग्रह गरिएको छ ।

एमाले केन्द्रीय सदस्य दीपक कार्कीले केपी ओली र झापा–५ एकअर्काका परिपूरक रहेको उल्लेख गर्दै विकास निर्माणका काम र जनतासँगको प्रत्यक्ष सम्बन्धका कारण ओलीले सहजै जित हासिल गर्ने दाबी गरे ।

उनका अनुसार मतदातालाई जानकारी गराउने उद्देश्यले अपिल तयार गरिएको हो । यस्तो सामग्री घरदैलो अभियानमा उपयोगी हुने र प्रत्येक वडामा ठूलो संख्यामा वितरण गरिने उनले जानकारी दिए ।