रहबर अन्सारी: मधेशबाट विकासको विगुल फुक्छ, गाडिएका सपना अब ज्वालामुखीझैँ बाहिरिन्छन्

काठमाडाैं । नेपाली कम्युनिस्ट पार्टी छाडेर राष्ट्रिय स्वतन्त्र पार्टी (रास्वपा) प्रवेश गरेका नेता रहबर अन्सारीले मधेशबाट विकासको विगुल फुकिने दाबी गर्नुभएको छ।

सोमबार जनकपुरमा आयोजित रास्वपाको सभालाई सम्बोधन गर्दै अन्सारीले अघिल्ला नेतृत्वले धेरै भाषण गरे पनि मधेशी जनताको सपना जमिनमुनि गाडिएको आरोप लगाउनुभयो। ती गाडिएका सपनालाई अब इमानदार नेतृत्व र सामूहिक प्रयासबाट ज्वालामुखीझैँ विस्फोट गराउँदै विकासको आधार बनाइने उहाँको भनाइ थियो।

‘हिजो धेरै भाषण गरिए, तर मधेशी जनताको सपना यही जमिनमुनि गाडियो,’ अन्सारीले भन्नुभयो, ‘त्यही सपना यहाँको इमानदार नेतृत्व र निष्ठाले, हामी सबैको प्रयासले निकालेर ज्वालामुखीझैँ मधेशबाटै देशको विकासको विगुल फुकिनेछ। यही विश्वासका साथ म रास्वपामा आएको हुँ।’

अन्सारीले रास्वपाका सभापति रवि लामिछानेको त्याग र वरिष्ठ नेता बालेन शाहको क्षमताको उद्घोष मधेशले गरिरहेको उल्लेख गर्नुभयो।

‘रास्वपा शान्तिले चिनिन्छ, निलो रङले चिनिन्छ,’ उहाँले भन्नुभयो, ‘आज मधेशी भूमिमा मधेशकै छोरा यो देशको नेतृत्वको केन्द्रमा देख्न मधेशले चाहेको छ। रास्वपाले बनाएको त्यो सम्भावना मधेशले प्रधानमन्त्रीको रूपमा हेर्न चाहन्छ।’

मधेशले दुःख, संघर्ष र परिवर्तनको शक्ति चिनेको उल्लेख गर्दै अन्सारीले रवि लामिछानेको त्याग र बालेन शाहको क्षमतामा मधेशको भरोसा रहेको बताउनुभयो।