19
Shares
काठमाडौं । नेपाल संवत् ११४७ को नयाँ वर्षको अवसरमा काभ्रेपलाञ्चोकको ऐतिहासिक नगरी पनौतीमा सांस्कृतिक झाँकीसहित भिन्तुना र्याली आयोजना गरिएको छ। नेवारी कला, संस्कृति, मौलिक परम्परा तथा सामाजिक एकताको सन्देश प्रवाह गर्ने उद्देश्यले निकालिएको र्यालीमा विभिन्न जातजाति तथा समुदायका प्रतिनिधिहरूको उत्साहजनक सहभागिता रहेको थियो।
पनौती नेपालद्वारा आयोजित र्यालीमा नेवारी समुदायको मौलिक कला, संस्कृति, परम्परागत बाजागाजा र पहिरन झल्कने विभिन्न सांस्कृतिक झाँकी प्रदर्शन गरिएको थियो। सहभागीहरूले परम्परागत वेशभूषा धारण गरी मौलिक बाजागाजाको धुनसँगै र्यालीमा सहभागिता जनाएका थिए। र्यालीले पनौतीको सांस्कृतिक पहिचान, ऐतिहासिक महत्त्व र विविधतायुक्त सामाजिक संरचनालाई उजागर गरेको थियो।
र्यालीमा नेवार समुदायका साथै विभिन्न जातजाति, भाषा, धर्म र संस्कृतिसँग आबद्ध प्रतिनिधिहरूको सहभागिता रहेको थियो। विविध समुदायका मानिसहरू एकै ठाउँमा भेला भई नयाँ वर्षको शुभकामना आदानप्रदान गर्दै आपसी सद्भाव, सहिष्णुता र एकताको सन्देश प्रवाह गरेका थिए।
कार्यक्रममा पनौती नगरपालिकाका प्रमुख रामशरण भण्डारीले भिन्तुना र्यालीलाई कुनै एक समुदायको सांस्कृतिक कार्यक्रमका रूपमा मात्र सीमित राख्न नहुने बताउनुभयो। उहाँले यस्तो कार्यक्रमले सबै जातजाति तथा समुदायबीच आपसी एकता, सद्भाव र भाइचाराको सम्बन्ध बलियो बनाउन महत्त्वपूर्ण भूमिका खेल्ने उल्लेख गर्नुभयो।
नगरप्रमुख भण्डारीले समाजमा रहेका विभिन्न जातजातिका चाडपर्व, संस्कृति र परम्परालाई साझा उत्सवका रूपमा विकास गर्नुपर्नेमा जोड दिनुभयो। सबै समुदायका मौलिक पहिचान र संस्कृतिको सम्मान गर्दै एकअर्काका पर्व तथा उत्सवमा सहभागी हुने वातावरण निर्माण गर्न सके सामाजिक एकता अझ सुदृढ हुने उहाँको भनाइ थियो।
उहाँले नेपाल संवत् नेपालको मौलिक इतिहास, संस्कृति र पहिचानसँग जोडिएको महत्त्वपूर्ण संवत् भएको उल्लेख गर्दै यसको संरक्षण तथा प्रवर्द्धन सबैको साझा जिम्मेवारी भएको बताउनुभयो। नेपाल संवत्को ऐतिहासिक महत्त्वलाई नयाँ पुस्तासम्म पुर्याउन यस्ता सांस्कृतिक कार्यक्रमले सहयोग पुग्ने उहाँले धारणा व्यक्त गर्नुभयो।
यसैगरी, पनौती ऐतिहासिक, धार्मिक तथा सांस्कृतिक सम्पदाले सम्पन्न नगर भएकाले यहाँका पुराना मठमन्दिर, ऐतिहासिक संरचना, जात्रा, पर्व र मौलिक संस्कृतिको संरक्षण तथा विकासमा नगरपालिकाले विशेष ध्यान दिने उहाँले बताउनुभयो।
पनौतीको ऐतिहासिक तथा सांस्कृतिक पहिचानलाई राष्ट्रियस्तरमा थप परिचित गराउन स्थानीय समुदाय, सामाजिक संघसंस्था र नगरपालिकाबीच सहकार्य आवश्यक रहेको पनि उहाँको भनाइ थियो।
नेपाल संवत् नयाँ वर्षको अवसरमा आयोजना गरिएको भिन्तुना र्यालीले सांस्कृतिक विविधताबीचको एकता, मौलिक परम्पराको संरक्षण र सामाजिक सद्भावको महत्त्वलाई उजागर गरेको छ। यस्ता कार्यक्रमले नयाँ पुस्तालाई आफ्नो भाषा, कला, संस्कृति र इतिहासप्रति जागरुक बनाउनुका साथै स्थानीय सम्पदाको संरक्षणमा समेत सकारात्मक योगदान पुर्याउने अपेक्षा गरिएको छ।
फेसबुकबाट तपाईको प्रतिक्रिया