सातामा दुई दिन बिदा दिँदा वर्षमा ४० दिन थप बिदा, पठनपाठन प्रभावित हुने चिन्ता

सरकारले सातामा शनिबार र आइतबार सार्वजनिक बिदा दिने व्यवस्था लागू गरेपछि वर्षभरिमा करिब ४० दिन थप बिदा हुने अवस्था बनेको छ । यसले विद्यालयको पठनपाठन, पाठ्यक्रम पूरा गर्ने समय र शैक्षिक क्यालेन्डर व्यवस्थापनमा चुनौती थपिने भन्दै शिक्षा क्षेत्रका सरोकारवालाले चिन्ता व्यक्त गरेका छन् ।

सरकारले पेट्रोलियम पदार्थको आपूर्तिमा देखिएको असहजतालाई ध्यानमा राख्दै २०८२ चैत २३ गतेदेखि सरकारी कार्यालय र शैक्षिक संस्थामा साताको दुई दिन बिदा दिने निर्णय गरेको थियो । यससँगै नयाँ शैक्षिक सत्र २०८३ वैशाख १५ गतेदेखि सुरु गर्ने निर्णयसमेत गरिएको थियो । राष्ट्रिय निजी तथा आवासीय विद्यालय एसोसिएसन नेपाल (नेसनल प्याब्सन) ले सातामा दुई दिन बिदा हुँदा निर्धारित पाठ्यक्रम समयमै पूरा गर्न कठिन हुने जनाएको छ ।

संस्थाले शैक्षिक सत्र ढिलो सुरु गर्ने निर्णयले पनि विद्यालयको वार्षिक कार्यतालिकामा दबाब पर्ने भन्दै कम्तीमा २२० दिन विद्यालय सञ्चालन हुने व्यवस्था मिलाउन आग्रह गरेको छ । सार्वजनिक बिदाको व्यवस्थाले शिक्षा र सरकारी सेवा प्रवाहमा पार्न सक्ने प्रभावबारे बहस भइरहेको छ । सरकारले बिदा व्यवस्थापनसँगै पठनपाठनको समय, पाठ्यक्रम र सेवा प्रवाहलाई प्रभावकारी बनाउने उपायमा ध्यान दिनुपर्ने देखिन्छ ।