कंगोमा इबोला महामारी भयावह, सङ्क्रमितको सङ्ख्या ९ हजार नाघ्यो

 नाघ्योमुलुक प्रजातान्त्रिक गणतन्त्र कंगोमा फैलिएको इबोला महामारीले भयावह रूप लिएको छ । महामारीबाट सङ्क्रमित हुनेको सङ्ख्या ९ हजार नाघेको छ भने ४ हजार ३८१ जनाको मृत्यु भएको छ । गत मे १५ मा घोषणा गरिएको यो प्रकोप कंगोको इतिहासकै सबैभन्दा घातक इबोला महामारी बनेको छ ।

हालसम्म ९ हजार ६६ जना सङ्क्रमित भएका छन् । तीमध्ये २ हजार ३८९ जना उपचारपछि निको भएका छन् । महामारी सातवटा प्रान्तका ६५ स्वास्थ्य क्षेत्रमा फैलिएको छ । सबैभन्दा बढी प्रभावित इटुरी प्रान्तमा कुल सङ्क्रमितमध्ये ७३.८ प्रतिशत रहेका छन् भने उत्तर किभु प्रान्तमा मृत्युदर ५७.१ प्रतिशत पुगेको छ । समग्रमा महामारीको मृत्युदर ४८.३ प्रतिशत रहेको छ ।

केही क्षेत्रमा सङ्क्रमण नियन्त्रणतर्फ अघि बढेको सङ्केत देखिए पनि विश्व स्वास्थ्य संगठनले विभिन्न स्थानमा भाइरसको फैलावट जारी रहेको भन्दै चिन्ता व्यक्त गरेको छ । समुदायमा भइरहेका मृत्युको उच्च सङ्ख्या र सङ्क्रमितको सम्पर्कमा आएका व्यक्तिको पहिचान तथा निगरानीमा देखिएका कमजोरीले नियन्त्रण प्रयासलाई थप चुनौतीपूर्ण बनाएका छन् ।

महामारी बुन्डिबुग्यो प्रजातिको इबोला भाइरसका कारण फैलिएको हो । यस भाइरसविरुद्ध हालसम्म कुनै विशेष खोप वा उपचार विधिले आधिकारिक स्वीकृति पाएको छैन । यही चुनौतीबीच ‘टुमाइनी’ नामक खोप परीक्षण अघि बढाउने तयारी गरिएको छ । अनुसन्धानका क्रममा अग्रपङ्क्तिमा खटिएका स्वास्थ्यकर्मीलाई ‘इर्भेबो’ खोप पनि लगाइएको छ ।

तर उक्त खोप जैर प्रजातिको इबोला भाइरसविरुद्ध प्रयोग हुने भएकाले बुन्डिबुग्यो भाइरसविरुद्ध यसको प्रभावकारिता अझै पुष्टि हुन बाँकी छ । सङ्क्रमण र मृत्युको सङ्ख्या बढ्दै जाँदा महामारी नियन्त्रणका लागि प्रभावकारी निगरानी, उपचार र खोपसम्बन्धी अनुसन्धानलाई तीव्र बनाउनुपर्ने आवश्यकता देखिएको छ ।