मध्यपूर्वमा अमेरिकी सैन्य उपस्थिति ५० हजार नाघ्यो, तेल मूल्य उकालो

एजेन्सी । पश्चिम एशियामा हाल ५० हजारभन्दा बढी अमेरिकी सेना तैनाथ गरिएको छ ।

अमेरिकी राष्ट्रपति डोनाल्ड ट्रम्प ले इरान मा जारी युद्धका सन्दर्भमा थप रणनीतिक निर्णय लिने तयारी गरिरहेका बेला सैनिक संख्या उल्लेख्य रूपमा बढाइएको The New York Times ले जनाएको छ । यो संख्या सामान्य अवस्थाभन्दा करिब १० हजारले बढी रहेको र करिब २० वर्षपछि पहिलो पटक ५० हजारभन्दा बढी सैनिक यस क्षेत्रमा तैनाथ गरिएको उल्लेख छ ।

BBC र NewsNation का अनुसार हालै ३ हजार ५ सय नाविक र मरीनहरू USS Tripoli मार्फत क्षेत्रमा पुगेका छन् ।

‘यूएसएस त्रिपोली’ ले मरीन सैनिक, हेलिकोप्टर तथा एफ–३५बी लडाकु विमान बोक्न सक्ने क्षमता राख्छ । अमेरिकी सेना बहराइन, कुवेत, कतार र साउदी अरेबिया सहित कम्तीमा १९ स्थानमा तैनाथ छन् ।

यसैबीच राष्ट्रपति ट्रम्पले खार्ग टापु सजिलै नियन्त्रणमा लिन सकिने दाबी गर्दै इरानको तेल स्रोत कब्जा गर्न सक्ने बताएका छन् ।

मध्यपूर्वमा तनाव बढिरहँदा अन्तर्राष्ट्रिय बजारमा कच्चा तेलको मूल्य तीव्र रूपमा बढेको छ । हाल तेलको मूल्य प्रतिब्यारेल ११५ अमेरिकी डलर नाघेको छ । गत फेब्रुअरी २८ अघि भने तेलको मूल्य करिब ७२ डलरमा कारोबार भइरहेको थियो । अमेरिका र इजरायल ले इरानमाथि आक्रमण थालेपछि बजारमा उतारचढाव देखिएको हो ।