आंशिक बदलीसँगै वर्षा र हिमपातको सम्भावना

काठमाडौं । मौसम पूर्वानुमान महाशाखाका अनुसार हाल नेपालमा पश्चिमी वायुका साथै स्थानीय वायुको आंशिक प्रभाव रहेको छ ।

आइतबार बिहान गण्डकी र लुम्बिनी प्रदेशसहित देशका हिमाली तथा पहाडी भू–भागमा सामान्य बदली रहेको छ भने अन्य स्थानमा आंशिक बदली देखिएको छ । तराई तथा उपत्यकाका केही क्षेत्रमा हुस्सु लागेको महाशाखाले जनाएको छ ।

दिउँसो देशका पहाडी तथा हिमाली भू–भागमा सामान्य बदली रहने र तराई क्षेत्रमा आंशिक बदली रहने अनुमान गरिएको छ । पहाडी तथा हिमाली भू–भागका केही स्थान तथा कोशी र लुम्बिनी प्रदेशका तराई क्षेत्रमा मेघगर्जन–चट्याङसहित हल्का वर्षा तथा हिमपातको सम्भावना रहेको छ ।

राति भने हिमाली क्षेत्रमा सामान्य बदली रहने र बाँकी पहाडी तथा तराई भू–भागमा आंशिक बदली रहने महाशाखाले जनाएको छ । कोशी र गण्डकी प्रदेशका पहाडी तथा हिमाली क्षेत्रका केही स्थानमा मेघगर्जन–चट्याङसहित हल्का वर्षा तथा हिमपात हुन सक्ने पूर्वानुमान गरिएको छ ।