काठमाडौं । मध्यपूर्वमा जारी द्वन्द्वका कारण बढ्दो ऊर्जा संकटबीच बिजुली र इन्धन बचत गर्न बंगलादेशले सोमबारदेखि सबै विश्वविद्यालयहरू बन्द गर्ने निर्णय गरेको छ। यससँगै त्यहाँ ईद–उल–फित्रको बिदा पनि अगाडि सारिएको छ।
सार्वजनिक र निजी दुवै क्षेत्रका विश्वविद्यालयहरूमा लागू हुने गरी अधिकारीहरूले यस्तो निर्णय गरेका हुन्। यस कदमले बिजुलीको खपत घटाउनुका साथै सवारीसाधनको चाप कम गरी इन्धनको अधिक प्रयोग रोक्न मद्दत पुग्ने विश्वास व्यक्त गरिएको छ।
विश्वविद्यालयका क्याम्पसहरूमा रहेका आवास गृह, कक्षाकोठा, प्रयोगशाला तथा एयर कन्डिसनिङ प्रणालीले धेरै बिजुली खपत गर्ने भएकाले बिदा अगाडि सार्दा देशको दबाबमा रहेको विद्युत् प्रणालीलाई राहत पुग्ने अधिकारीहरूले बताएका छन्।
मुस्लिम समुदायको पवित्र महिना रमजानका कारण बंगलादेशका सरकारी तथा निजी विद्यालयहरू पहिले नै बन्द भइसकेका छन्। त्यसैले अब देशका अधिकांश शैक्षिक संस्थाहरू यस अवधिभर बन्द रहनेछन्।
मध्यपूर्वमा जारी द्वन्द्वका कारण विश्वव्यापी ऊर्जा बजारमा अवरोध आएपछि बंगलादेशले इन्धन र ग्यास आपूर्तिमा बढ्दो अनिश्चितता सामना गरिरहेको छ। आफ्नो ऊर्जा आवश्यकताको करिब ९५ प्रतिशत आयातमा निर्भर रहेको बंगलादेशले सर्वसाधारणमा देखिएको त्रास र इन्धन भण्डारण गर्ने प्रवृत्तिलाई ध्यानमा राख्दै शुक्रबारदेखि इन्धन बिक्रीमा दैनिक सीमा तोकेको छ।
आर्थिक मितव्ययिता अपनाउने योजनाअनुसार सरकारले विदेशी पाठ्यक्रममा सञ्चालन हुने विद्यालय र निजी कोचिङ सेन्टरहरूलाई पनि बिजुलीको खपत कम गर्न यस अवधिमा आफ्ना गतिविधि स्थगित गर्न निर्देशन दिएको छ।
ग्यासको चरम अभावका कारण बंगलादेशले आफ्ना पाँचमध्ये चारवटा सरकारी मल कारखाना बन्द गर्नुपरेको छ। त्यहाँबाट बचत भएको ग्यास विद्युत् कटौती हुन नदिन पावर प्लान्टतर्फ पठाउन थालिएको छ।
यसका साथै बंगलादेशले उच्च मूल्य तिरेर स्पट बजारबाट तरल प्राकृतिक ग्यास खरिद गरेको छ र आपूर्तिको कमी कम गर्न थप कार्गोहरूको खोजी गरिरहेको छ।
ऊर्जा मन्त्रालयका एक वरिष्ठ अधिकारीका अनुसार सरकारले खपत घटाउने तथा बिजुली, इन्धन र आयातित सामग्रीको आपूर्तिमा स्थिरता ल्याउन विभिन्न उपायहरू अवलम्बन गरिरहेको छ।
फेसबुकबाट तपाईको प्रतिक्रिया