इरानद्वारा कतारस्थित अमेरिकी अल उदैद सैन्य बेसमा क्षेप्यास्त्र प्रहार

काठमाडौं । इरानले कतारस्थित अमेरिकाको अल उदैद एयर बेसमा ब्यालेस्टिक क्षेप्यास्त्र प्रहार गरेको जनाएको छ ।

अल उदैदमा रहेको अमेरिकी सेनाको विशाल सैन्य अखडामा इरानी क्षेप्यास्त्र खसेको बताइएको छ । यो खाडी क्षेत्रमा रहेको अमेरिकाको सबैभन्दा ठूलो सैन्य बेस हो । कतारको रक्षा मन्त्रालयले विज्ञप्ति जारी गर्दै इरानबाट कतारलाई निशाना बनाएर दुईवटा ब्यालेस्टिक क्षेप्यास्त्र प्रहार भएको जानकारी दिएको छ ।

कतारी रक्षा मन्त्रालयका अनुसार हवाई प्रतिरक्षा प्रणालीले एउटा क्षेप्यास्त्रलाई बीचैमा नष्ट गरेको थियो भने अर्को क्षेप्यास्त्र अल उदैदस्थित बेस क्षेत्रमा खसेको हो । उक्त सैन्य अखडामा करिब १० हजार अमेरिकी सैनिक तथा गैरसैनिक कर्मचारी तैनाथ रहने गर्दछन् ।

मध्यपूर्वमा अमेरिकी सेनाको कमान्ड सञ्चालन हुने यो सैन्य शिविर United States Central Commandसँग आबद्ध रहेको बताइएको छ, जसको मुख्यालय फ्लोरिडामा रहेको छ ।

यसैबीच, इरानको इस्लामिक रिभोलुसनरी गार्ड्स कर्प्सले मध्यपूर्व क्षेत्रमा अमेरिकी तथा इजरायलका सैन्य अखडाहरूमा करिब ४० वटा क्षेप्यास्त्र प्रहार गरेको दाबी गरेको छ ।