पश्चिमी न्यूनचापीय प्रणाली सक्रिय, उच्च भू-भागमा हिमपातको सम्भावना

काठमाडौं । हाल देशभर पश्चिमी न्यूनचापीय प्रणालीको प्रभाव कायम रहेको मौसम पूर्वानुमान महाशाखाले जनाएको छ। यसको प्रभावका कारण विभिन्न प्रदेशका पहाडी तथा हिमाली भू-भागमा बदली र केही स्थानमा वर्षा तथा हिमपातको सम्भावना रहेको छ।

बुधबार बिहान
बागमती र गण्डकी प्रदेशसहित देशका पहाडी तथा हिमाली क्षेत्रमा सामान्य बदली रहनेछ। अन्य भू-भागमा आंशिक बदली रहने महाशाखाले जनाएको छ।

बुधबार दिउँसो
तराईका केही स्थानमा हुस्सु तथा कुहिरो लाग्ने सम्भावना रहेको छ। कोशी, बागमती र गण्डकी प्रदेशका उच्च पहाडी तथा हिमाली भू-भागमा सामान्य बदली रहनेछ भने अन्य क्षेत्रमा आंशिक बदली रहनेछ। यी प्रदेशका उच्च भू-भागका केही स्थानमा हल्का वर्षा तथा हिमपातको सम्भावना रहेको छ।

बुधबार राति
तराईका केही स्थानमा पुनः हुस्सु लाग्ने अनुमान छ। कोशी, बागमती र गण्डकी प्रदेशका उच्च पहाडी तथा हिमाली क्षेत्रमा आंशिक बदली रहनेछ भने देशका बाँकी भू-भागमा मौसम मुख्यतया सफा रहनेछ। कोशी र गण्डकी प्रदेशका उच्च भू-भागका एक–दुई स्थानमा हल्का वर्षा तथा हिमपातको सम्भावना रहेको महाशाखाले जनाएको छ।

मौसममा आउने परिवर्तनका कारण उच्च पहाडी तथा हिमाली क्षेत्रमा यात्रा गर्दा आवश्यक सतर्कता अपनाउन महाशाखाले सुझाव दिएको छ।