विपद्बाट प्रभावित ४९ वटै वडाको क्षति विवरण प्रमाणित गर्न संसदीय समितिको निर्देशन

भोटेकोशी एवं कालीगण्डकी करिडोरमा विपद्बाट प्रभावित ४९ वटै वडाको क्षतिको छुट्टाछुट्टै विवरण प्रमाणित गरेर उपलब्ध गराउन संसदीय विशेष समितिले सरकारसँग माग गरेको छ ।

बुधबार सिंहदरबारमा भएको छलफलमा समितिका सभापति कृष्णप्रसाद पौडेलले प्रत्येक वडामा भएको मानवीय क्षति, बेपत्ता भएका व्यक्ति, कृषि तथा अन्य क्षेत्रको नोक्सानी र राहत वितरणको वास्तविक विवरण उपलब्ध गराउन सम्बन्धित मन्त्रालयलाई निर्देशन दिनुभयो ।

स्थलगत निरीक्षणअघि सरकारी निकायबाट प्रमाणित तथ्याङ्क आवश्यक रहेको उहाँको भनाइ रहेको छ । समितिले सरकारी विवरणमा उल्लेख भएको राहत वितरण र प्रभावित नागरिकले वास्तविक रूपमा प्राप्त गरेको राहतको अवस्था पनि तुलना गर्ने जनाएको छ ।

सरकारी निकायले राहत उपलब्ध गराएको दाबी गरे पनि प्रभावित नागरिकले पाए वा पाएनन् भन्ने विषयमा स्थलगत रूपमा जानकारी लिइनेछ । सभापति पौडेलले प्रमाणित तथ्याङ्क प्राप्त भएपछि मात्रै स्थलगत निरीक्षण अघि बढाउने र तथ्यमा आधारित विश्वसनीय प्रतिवेदन तयार गरिने बताउनुभयो ।