हिउँ हटेपछि थोराङ्ला पासमा पदयात्रीको चहलपहल

हिमपातका कारण प्रभावित बनेको अन्नपूर्ण चक्रीय पदमार्गअन्तर्गतको थोराङ्ला पासमा हिउँ हटाएर बाटो खुलाइएपछि पदयात्रीको आवागमन सहज बन्दै गएको छ । मनाङ र मुस्ताङलाई जोड्ने उच्च हिमाली मार्गमा हिउँ जम्दा यात्रा कठिन बनेको थियो । अहिले पदमार्गको अवरोध हटाउने कामपछि स्वदेशी तथा विदेशी पर्यटकले यात्रा अघि बढाउन थालेका छन् ।

अन्नपूर्ण संरक्षण क्षेत्र आयोजना, पदयात्रा व्यवस्थापन तथा सुरक्षा समितिका साथै नेपाल प्रहरी र सशस्त्र प्रहरी बलको संयुक्त टोलीले हिउँ हटाउने र सुरक्षित बाटो पहिल्याउने काम गरेको छ । थोराङ फेदीदेखि पासतर्फको बाटो खुलाइएपछि पदयात्रीलाई गन्तव्यसम्म पुग्न सहज भएको हो ।

दैनिक २० देखि २५ जनासम्म पदयात्रीले थोराङ्ला पास पार गरिरहेका छन् । समुद्री सतहबाट पाँच हजार ४१६ मिटर उचाइमा रहेको थोराङ्ला पास अन्नपूर्ण चक्रीय पदमार्गको महत्त्वपूर्ण र चुनौतीपूर्ण गन्तव्य हो । हिमाली भूगोल, हिउँले ढाकिएका पहाड र प्राकृतिक दृश्यका कारण यो मार्ग विदेशी पर्यटकको आकर्षणमा पर्दै आएको छ ।

पदमार्ग खुला भएसँगै यस क्षेत्रमा पर्यटन गतिविधि पुनः चलायमान बन्न थालेको छ । उच्च हिमाली क्षेत्रमा मौसम छिटो परिवर्तन हुन सक्ने र केही स्थानमा हिउँ पग्लिएपछि बाटो चिप्लो तथा हिलाम्मे बन्ने जोखिम कायमै छ ।