कुशे औंसी अर्थात बाबुको मुख हेर्ने दिन आज विविध कार्यक्रम गरी मनाइँदै

काठमाडाैं । प्रत्येक वर्ष भाद्र कृष्ण औंसीका दिन मनाइने कुशे औंसी पर्व शुक्रबार वैदिक सनातन धर्मावलम्बीहरुले वर्षभरि देवकार्य तथा पितृकार्यमा प्रयोग गरिने पवित्र कुश घर-घरमा भित्र्याएर मनाउँदैछन् ।

देवकार्य र पितृकार्यमा प्रयोग हुने कुश यस दिन ब्राह्मणहरूले विधिपूर्वक पूजा गरी छेदन गरेर घर-घरमा पुर्‍याउने प्रचलन रहेकाे छ । घरमा कुश राख्दा परिवारमा सुख, शान्ति र कल्याण हुने धार्मिक विश्वास रहिआएको हाे। कुशे औंसीकै दिन छोराछोरीले आफ्ना बाबुलाई मिठा परिकार खुवाएर सम्मान गर्ने चलन समेत रहेकाे छ ।

त्यसैले यस दिनलाई ‘बाबुको मुख हेर्ने दिन’ र पितृ दिवस पनि भनिन्छ । बाबु दिवङ्गत भइसकेकाहरूले भने काठमाडौंको गोकर्णेश्वर उत्तरगया पितृ तीर्थमा पुगेर दिवङ्गत पिताका नाममा तर्पण, श्राद्ध र सिधा दान गर्ने गर्छन् । रसुवाको वेत्रावतीमा पनि यस्तै धार्मिक गतिविधि हुने गर्दछ ।

तर यस वर्ष भने भोटेकोशीको बाढीले तहसनहस पारेकोले वेत्रावतीमा कुनै चहलपहल छैन । कुशे औंसीका अवसरमा शुक्रबार गोकर्णमा विशेष मेला समेत लागेको छ। यस दिनमा थोरै दान गरे पनि हजारौँ गुणा बढी फल पाइने भएकाले पुण्य पर्वका रूपमा समेत लिइन्छ ।