सिंहदरबारमा जेनजी शहीद स्मारक पार्कको शिलान्यास

काठमाडौं । सिंहदरबारस्थित संघीय संसद् भवन परिसरमा ‘जेनजी शहीद स्मारक पार्क तथा शालिक र स्तम्भ’को शिलान्यास गरिएको छ ।

आइतबार एक कार्यक्रमबीच गृहमन्त्री सुधन गुरुङ र पूर्वाधार विकासमन्त्री सुनिल लम्सालले संयुक्त रूपमा स्मारक पार्क, शालिक तथा स्तम्भको शिलान्यास गरेका हुन् ।

शिलान्यासपछि सञ्चारकर्मीसँग कुरा गर्दै गृहमन्त्री गुरुङले जेनजी पुस्ताले अघि सारेका माग सम्बोधन गर्न सरकार प्रतिबद्ध रहेको बताए ।

उनले जेनजी पुस्ताको आन्दोलनका क्रममा शहीद भएकाहरू सबैको शालिक निर्माण गरिने बताए । ‘हामी आफैँ कसम खाएर आएका छौँ, त्यो उहाँहरूको माग पूरा गर्छौँ । आन्दोलनको क्रममा जति जना शहीद हुनुभएको छ, उहाँहरू सबैको शालिक बन्छ,’ गुरुङले भने ।

सरकारले जेनजी शहीद दिवसको अवसरमा आगामी भदौ २३ गते मुलुकभर सार्वजनिक बिदा दिने निर्णयसमेत गरेको छ ।