13
Shares
एजेन्सी। अमेरिका, बेलायत, फ्रान्स र जर्मनीले इरानको आणविक कार्यक्रमलाई लिएर अन्तर्राष्ट्रिय दबाब थप बढाउने तयारी गरेका छन् ।
४ देशले राष्ट्रसंघको आणविक निगरानी संस्था अन्तर्राष्ट्रिय आणविक ऊर्जा एजेन्सी (आईएईए) को बोर्ड अफ गभर्नर्स समक्ष इरानले आणविक अप्रसार सम्बन्धी आफ्ना कानूनी दायित्व पालना नगरेको विषय संयुक्त राष्ट्रसंघ सुरक्षा परिषदमा पठाउने प्रस्ताव अघि बढाउने तयारी गरेका हुन् । प्रस्ताव अहिले वार्ताको चरणमा रहेको र आईएईए बोर्ड समक्ष औपचारिक रूपमा प्रस्तुत भइनसकेको एएफपीले जनाएको छ।
प्रस्तावमा आईएईएका महानिर्देशक राफेल ग्रोसीलाई यसअघि पारित गरिएका सम्बन्धित प्रस्तावहरू आईएईएका सबै सदस्य राष्ट्रसँगै संयुक्त राष्ट्रसंघ सुरक्षा परिषद् र महासभासम्म पुर्याउन आग्रह गरिएको हाे। प्रस्तावमा इरानको आणविक कार्यक्रमबाट उत्पन्न चुनौतीको कूटनीतिक समाधान खोज्नुपर्नेमा समेत जोड दिइएको छ।
साथै, सबै पक्षलाई वार्तामा रचनात्मक रूपमा सहभागी हुन आह्वान गरिएको हाे। सन् २०२५ मा अमेरिका र इजरायलले इरानका आणविक स्थलमा आक्रमण गरेपछि इरानले प्रभावित आणविक स्थलमा आईएईएका निरीक्षकलाई प्रवेश दिएको छैन । आईएईएले निरीक्षकलाई प्रवेश नदिइनु तथा आणविक सामग्रीको अवस्थाकाे बारेमा पुष्टि हुन नसक्नुले आणविक प्रसारको जोखिम बढाएको चेतावनी दिएकाे हाे। आईएईएले साेही विषयमा तत्काल ध्यान दिन आवश्यक रहेको बताउँदै आएको छ।
आईएईएले इरानसँग ४ सय ४० दशमलव ९ किलोग्राम युरेनियमको भण्डार रहेकाे जनाएकाे हाे । जसलाई ६० प्रतिशतसम्म शुद्धतामा समृद्ध पारिएको छ। आणविक हतियार निर्माणका लागि सामान्यतया करिब ९० प्रतिशत शुद्धता भएको युरेनियम आवश्यक मानिन्छ ।
फेसबुकबाट तपाईको प्रतिक्रिया