प्रधानमन्त्री बालेन र सभामुख अर्यालबीच भेटवार्ता

काठमाडौं । प्रधानमन्त्री बालेन शाह र सभामुख डीपी अर्यालबीच बिहीबार भेटवार्ता भएको छ । प्रतिनिधिसभा बैठकमा विपक्षी दलहरूले प्रधानमन्त्रीको उपस्थितिको माग गर्दै लगातार प्रश्न उठाइरहेका बेला सभामुख अर्याल प्रधानमन्त्रीलाई भेट्न पुगेका हुन् ।

प्रधानमन्त्री र सभामुखबीच करिब आधा घण्टा छलफल भएको बताइएको छ । भेटमा संसद्को पछिल्लो अवस्था र प्रतिनिधिसभा बैठक सञ्चालनका विषयमा कुराकानी भएको स्रोतले जनाएको छ ।

यता, विपक्षी सांसदहरूले प्रधानमन्त्री शाहको खोजी गर्दै सदनमा निरन्तर आवाज उठाइरहेका छन् । उनीहरूले प्रधानमन्त्रीलाई संसद्मा उपस्थित गराउन सभामुखले रुलिङ गर्नुपर्ने माग गर्दै आएका छन् । तर, सभामुखले हालसम्म प्रधानमन्त्रीलाई बैठकमा उपस्थित हुन औपचारिक रुलिङ गरेका छैनन् ।

प्रधानमन्त्रीको अनुपस्थितिमा भने सरकारका तर्फबाट मन्त्रीहरूले संसद्मा जवाफ दिने तथा विधेयक पेश गर्ने काम गरिरहेका छन् ।