ओली र लेखकलाई ५ दिन थुनामा राख्न अदालतको अनुमति

काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओली र नेपाली कांग्रेसका नेता तथा पूर्वगृहमन्त्री रमेश लेखकलाई थुनामा राखेर अनुसन्धान अघि बढाउन अदालतले अनुमति दिएको छ ।

आइतबार काठमाडौं जिल्ला अदालतका न्यायाधीश आनन्दप्रसाद श्रेष्ठको इजलासले ५ दिनको म्याद थप गर्न अनुमति दिएको अदालतका सूचना अधिकारी दीपककुमार श्रेष्ठले जानकारी दिए ।

सरकारी वकिलले दुवैलाई थुनामा राखेर अनुसन्धान गर्न माग गरेपछि अदालतले उक्त अनुमति दिएको हो ।

गत भदौ २३ र २४ गते भएको जेनजी आन्दोलनका क्रममा भएको दमनसम्बन्धी घटनामा उनीहरूलाई अनुसन्धानका लागि पक्राउ गरिएको हो ।

उक्त समयमा केपी शर्मा ओली प्रधानमन्त्री तथा रमेश लेखक गृहमन्त्री रहेका थिए ।

आन्दोलनमा भएको दमनबारे छानबिन गर्न गठित आयोगले दुवैलाई फौजदारी मुद्दामा कारबाही अघि बढाउन सिफारिस गरेको थियो । सोही सिफारिसका आधारमा शनिबार उनीहरूविरुद्ध जरुरी पक्राउ पुर्जी जारी गरी नियन्त्रणमा लिइएको हो ।

आइतबार अदालतमा रमेश लेखक स्वयं उपस्थित भएका थिए भने बिरामी रहेका केपी शर्मा ओलीलाई त्रिवि शिक्षण अस्पतालमार्फत भर्चुअल रूपमा उपस्थित गराइएको थियो ।