दुई दिनमै तोलामा ७६०० ले घट्यो सुन, चाँदीको मूल्य पनि ओरालो

काठमाडाैं । नेपाली बजारमा बिहीबार सुनचाँदीको मूल्य घटेको छ । नेपाल सुनचाँदी व्यवसायी महासंघ का अनुसार बुधबार दुई हजार दुई सय रुपैयाँले घटेको सुन बिहीबार थप पाँच हजार चार सय रुपैयाँले घटेको हो ।

यससँगै दुई दिनमा सुनको मूल्य प्रतितोला सात हजार ६ सय रुपैयाँले घटेको छ । बिहीबार सुन प्रतितोला तीन लाख दुई हजार तीन सय रुपैयाँमा कारोबार भइरहेको छ । बुधबार भने सुन प्रतितोला तीन लाख सात हजार सात सय रुपैयाँमा कारोबार भएको थियो ।

त्यस्तै, चाँदीको मूल्य पनि घटेको छ । बुधबार प्रतितोला पाँच हजार एक सय ५० रुपैयाँमा कारोबार भएको चाँदी बिहीबार घटेर प्रतितोला पाँच हजार १० रुपैयाँमा कारोबार भइरहेको छ । यो मूल्य अघिल्लो दिनको तुलनामा प्रतितोला एक सय ४० रुपैयाँले कम हो ।

अन्तर्राष्ट्रिय बजारमा भने सुन प्रतिऔंस चार हजार आठ सय ५१ अमेरिकी डलरमा कारोबार भइरहेको महासंघले जनाएको छ ।