काठमाडौंको वायु गुणस्तर अस्वस्थ तहमा, एक्यूआई १७१

काठमाडौं । काठमाडौं उपत्यकामा वायुको गुणस्तर लगातार खराब बन्दै गएको छ। आज बिहान वायु प्रदूषणको स्तर अस्वस्थताको तह नाघेको देखिएको छ।

रियल टाइममा मापन गर्ने स्विट्जरल्याण्डस्थित आईक्यू एयरका अनुसार समाचार तयार पार्दासम्म काठमाडौंको वायु गुणस्तर सूचकांक (एक्यूआई) १७१ पुगेको छ। १५० नाघेपछि वायु गुणस्तरलाई अस्वस्थ मानिन्छ।

नेपाल सरकारले स्वीकृत गरेको सूचकांकअनुसार ०–५० राम्रो, ५१–१०० मध्यम, १०१–१५० संवेदनशील समूहका लागि अस्वस्थ, १५१–२०० अस्वस्थ, २०१–३०० निकै अस्वस्थ र ३०१ भन्दा माथि खतरनाक तह मानिन्छ।

आज काठमाडौं समग्रमा संसारकै अस्वस्थ शहरहरूको सूचीमा १०औं स्थानमा परेको छ। सोही सूचीमा भारतको दिल्ली पहिलो र बंगलादेशको ढाका दोस्रो स्थानमा रहेका छन्। दिल्लीको वायु प्रदूषण खतरनाक तह अर्थात् ३०० नाघेको छ भने ढाकाको सूचकांक २८८ पुगेर निकै अस्वस्थ अवस्थामा रहेको जनाइएको छ।