शनिबार शनिदेवको पूजा विशेष : तेल दान, पिपल पूजा र हनुमान चालीसा पाठले जीवनमा सकारात्मक ऊर्जा आउने विश्वास

काठमाडौं । आज शनिबार हिन्दू धर्मावलम्बीहरूले शनिदेवको पूजा-आराधना गरी जीवनमा सकारात्मक ऊर्जा र शान्ति प्राप्त हुने विश्वासका साथ विभिन्न धार्मिक कर्मकाण्ड गर्ने परम्परा रहेको छ । शनिदेवलाई न्यायका देवता मानिन्छ, जसले व्यक्तिको कर्मअनुसार फल दिने विश्वास गरिन्छ ।

धार्मिक मान्यताअनुसार शनिदेव सूर्यका पुत्र हुन् भने आमाको रूपमा ‘छाया’ उल्लेख गरिएको छ । यमराज उनका भाइ तथा यमुना उनकी बहिनी मानिन्छन् । शनि देव कडा परिश्रम, अनुशासन र धर्मपालन गर्ने व्यक्तिप्रति प्रसन्न हुने विश्वास रहेको छ ।

शनिबार शनिदेवलाई खुसी पार्न तेल दान गर्ने, पिपलको पूजा गर्ने तथा कालो तिल दान गर्ने चलन रहेको छ । धार्मिक विश्वासअनुसार पिपलको रुखमा पानी चढाउँदा तथा नियमित पूजा गर्दा शुभ फल प्राप्त हुने मान्यता छ । त्यस्तै छालाका जुत्ता-चप्पल दान गर्दा पनि पुण्य मिल्ने विश्वास गरिन्छ ।

यसका साथै शमीको रूखको पूजा गर्ने तथा शनिबार हनुमान मन्दिरमा सर्सुको तेलको दीप जलाएर हनुमान चालीसा पाठ गर्ने परम्परा पनि प्रचलित छ । यसो गर्दा शनि दोष कम हुने, मानसिक शान्ति प्राप्त हुने र जीवनमा सकारात्मक प्रभाव पर्ने धार्मिक विश्वास रहेको छ ।

धार्मिक आस्थासँग जोडिएका यी अभ्यासहरू आ-आफ्नो विश्वास र परम्पराअनुसार गर्ने गरिन्छ । श्रद्धा, अनुशासन र सकारात्मक सोचले जीवनमा राम्रो प्रभाव पार्ने धार्मिक विद्वानहरू बताउँछन् ।