अर्थमन्त्री खनालद्वारा निर्वाचन तयारीको स्थलगत अनुगमन

काठमाडौँ – अर्थमन्त्री रामेश्वरप्रसाद खनालले आगामी फागुण २१ गते हुने प्रतिनिधिसभा सदस्य निर्वाचनको तयारी, सुरक्षा व्यवस्था र निर्वाचन आचारसंहिता पालनाको अवस्था बुझ्न तीनवटा पहाडी जिल्ला अनुगमन गर्नुभएको छ।

अर्थमन्त्री खनालले पछिल्लो दुई दिनमा तनहुँ, कास्की, पर्वत र म्याग्दी जिल्लामा स्थलगत अनुगमन गर्नुभएको हो। बुधबार कास्की, पर्वत र म्याग्दी जिल्लामा पुगेर उहाँले प्रमुख जिल्ला अधिकारी, सुरक्षा निकायका प्रमुख र जिल्ला निर्वाचन कार्यालयसँग छलफल तथा अवलोकन गर्नुभयो।

कास्कीमा प्रमुख जिल्ला अधिकारी रूद्रादेवी शर्माले आचारसंहिता पालनाको स्तर सन्तोषजनक रहेको र ५६ वटा मतदान केन्द्र अति संवेदनशील रहेको जानकारी दिनुभयो। पर्वतमा लक्ष्मीप्रसाद पौडेलले आचारसंहिता पालनाको अवस्था सन्तोषजनक र ३५ वटा मतदान केन्द्र अति संवेदनशील रहेको बताउनुभयो। म्याग्दीमा प्रमुख जिल्ला अधिकारी रविन्द्र आचार्यले आचारसंहिता पालनाको स्तर सन्तोषजनक र १५ वटा मतदान केन्द्र अति संवेदनशील रहेको जानकारी दिनुभयो।

तनहुँ जिल्लाको अनुगमन मंगलबार सम्पन्न भएको थियो। प्रमुख जिल्ला अधिकारी शिवलाल तिवारीले त्यहाँ निर्वाचन आचारसंहिता उल्लंघन सम्बन्धी कुनै उजुरी नपरेको र ८ वटा मतदान केन्द्र अति संवेदनशील रहेको जानकारी दिनुभएको थियो।

अनुगमनपछि अर्थमन्त्री खनालले चारै जिल्लामा निर्वाचन तयारी सन्तोषजनक रूपमा अघि बढिरहेको उल्लेख गर्नुभयो। उहाँले निर्वाचन स्वतन्त्र, निष्पक्ष र भयरहित वातावरणमा सम्पन्न गराउने सरकारको प्रतिबद्धता दोहोर्याउँदै सबै सरोकारवालाको सहयोग आवश्यक रहेको बताउनुभयो।