नेपाल प्रहरीको रासन स्केल वृद्धि गर्ने मन्त्रिपरिषद् बैठककाे निर्णय

काठमाडौं । नेपाल प्रहरीको रासन स्केल तथा रासन बापत पाउने दैनिक रकम वृद्धि गर्ने निर्णय सरकारले गरेको छ । बिहीवार प्रधानमन्त्री निवास बालुवाटारमा बसेको मन्त्रिपरिषद् बैठकले उक्त निर्णय गरेको हो ।

सरकारका प्रवक्ता एवं गृहमन्त्री ओमप्रकाश अर्यालले मन्त्रिपरिषद् बैठकका निर्णय सार्वजनिक गर्दै नेपाल प्रहरीको रासन स्केल र रासन बापतको दैनिक रकम बढाउने निर्णय गरिएको जानकारी दिनुभयो ।

गृहमन्त्री अर्यालका अनुसार नेपाल प्रहरीका कर्मचारीले पाउँदै आएको रासन स्केल र त्यसबापतको दैनिक रकम २०८२ साल फागुन १ गतेदेखि लागू हुने गरी वृद्धि गरिएको हो । यस निर्णयले प्रहरी संगठनभित्र सेवा–सुविधा सुधारमा टेवा पुग्ने अपेक्षा गरिएको छ ।

उहाँले बढ्दो महँगी, जीवनयापन खर्च र प्रहरी कर्मचारीको कार्यभारलाई मध्यनजर गर्दै सरकारले रासन स्केल तथा दैनिक रकम पुनरावलोकन गरी वृद्धि गर्ने निर्णय गरेको बताउनुभयो । यसले प्रहरी कर्मचारीको मनोबल उच्च बनाउने र सेवामा थप प्रेरणा मिल्ने विश्वास सरकारको छ ।

नेपाल प्रहरीका जवानदेखि अधिकृत तहसम्मका कर्मचारीले हाल रासन स्केलअन्तर्गत तोकिएको रकम पाउँदै आएका छन् । नयाँ निर्णय कार्यान्वयनमा आएपछि उनीहरूले दैनिक रूपमा पाउने रासन रकम बढ्नेछ, जसले खाद्यान्न तथा जीवनयापनमा सहजता ल्याउने अपेक्षा गरिएको छ ।

यसअघि लामो समयदेखि प्रहरी संगठनभित्र रासन स्केल तथा दैनिक भत्तामा सुधार गर्नुपर्ने माग उठ्दै आएको थियो । मन्त्रिपरिषद्को पछिल्लो निर्णयलाई उक्त मागको सम्बोधनका रूपमा हेरिएको छ ।

सरकारले सुरक्षाकर्मीको सेवा, सुविधा र कल्याणलाई प्राथमिकतामा राख्दै क्रमिक रूपमा सुधार गर्दै जाने नीति लिएको गृहमन्त्री अर्यालले उल्लेख गर्नुभयो ।