फागुन २१ मै निर्वाचन हुन्छ, तयारीमा जुट्नुस् : सहसंयोजक माधव नेपाल

काठमाडौं । नेपाली कम्युनिस्ट पार्टी (नेकपा) का सहसंयोजक तथा पूर्वप्रधानमन्त्री माधवकुमार नेपालले तोकिएकै मितिमा निर्वाचन हुने स्पष्ट पार्नुभएको छ।

मंगलबार काठमाडौंमा आयोजित पार्टी केन्द्रीय समितिका पदाधिकारी तथा सदस्यहरूको शपथग्रहण समारोहलाई सम्बोधन गर्दै उहाँले आगामी फागुन २१ गते निर्वाचन हुने उल्लेख गर्दै त्यसको तयारीमा जुट्न पार्टीका नेता तथा कार्यकर्तालाई निर्देशन दिनुभयो। सहसंयोजक नेपालले निर्वाचन समयमा हुँदैन कि भनेर चुप लागेर बस्ने प्रवृत्तिबाट टाढा रहन समेत सचेत गराउनुभयो।

“चुनावमा हाम्रो अग्नि परीक्षा हुनेछ। चुनाव हुन्छ भन्नेमा हामी स्पष्ट छौं। त्यसैले चुनाव हुँदैन कि भनेर पर्खेर बस्ने होइन, पूरै तयारीमा जुट्ने हो,” उहाँले भन्नुभयो। निर्वाचनका लागि पार्टीले घोषणा पत्र निर्माण गर्न कमिटी गठन गरिसकेको र मस्यौदा तयार गर्ने काम पनि अघि बढिसकेको उहाँले जानकारी दिनुभयो।

सहसंयोजक नेपालले निर्वाचन परिचालनका लागि पार्टीका संयोजक पुष्पकमल दाहाल ‘प्रचण्ड’ को नेतृत्वमा छिट्टै परिचालन कमिटी गठन गरिने बताउनुभयो। निर्वाचन पार्टीका लागि निर्णायक परीक्षा भएकाले त्यसलाई सफल बनाउन सिंगो पार्टी पंक्ति एकतावद्ध भएर परिचालन हुनुपर्ने उहाँको भनाइ छ।

“निर्वाचन परिचालन कमिटी प्रचण्डको नेतृत्वमा बनाइनेछ। त्यसपछि निर्वाचनसँग सम्बन्धित अन्य काम अघि बढ्नेछन्,” उहाँले भन्नुभयो। साथै निर्वाचनमा मतको रक्षा, पैसाको लेनदेनजस्ता विकृति रोक्ने र देखिएका चुनौतीको सामना गर्न पार्टीभित्र बलियो एकताको आवश्यकता रहेको उहाँले जोड दिनुभयो।