भदौ २३–२४ का घटनाबारे देउवा र दाहाललाई बयानका लागि आयोगको बोलावट

काठमाडाैं। गत भदौ २३ र २४ गते भएका घटनाको छानविनका लागि गठित जाँचबुझ आयोगले नेपाली कांग्रेसका सभापति शेरबहादुर देउवा र नेपाली कम्युनिस्ट पार्टीका संयोजक पुष्पकमल दाहाललाई बयानका लागि बोलाएको छ।

आयोग स्रोतका अनुसार दुवै नेतालाई घटनासँग सम्बन्धित प्रश्नहरू समेत पठाइएको छ। भदौ २४ गते भएको प्रदर्शनका क्रममा संयोजक दाहाल सिंहदरबारभित्रै रहेका थिए र सोही क्रममा सुरक्षाकर्मी तथा सेनाले उहाँलाई उद्धार गरेको थियो।

त्यसैगरी, सभापति देउवा भने उक्त दिन बूढानीलकण्ठस्थित आफ्नै निवासमा रहेका बेला जेनजी आन्दोलनकारीद्वारा कुटपिटमा परेका थिए। आन्दोलन चर्किँदै गएपछि तत्कालीन प्रधानमन्त्री केपी शर्मा ओलीले पद त्याग गरी हेलिकोप्टरमार्फत सिंहदरबारबाट बाहिरिएको घटनासमेत आयोगको छानविनको दायरामा रहेको स्रोतले जनाएको छ।

आयोगले कर्मचारी तथा सुरक्षाकर्मीहरूसँगको बयान प्रक्रिया सम्पन्न गरिसकेको छ। अब एमाले अध्यक्ष केपी शर्मा ओलीलाई समेत बयानका लागि पत्र पठाउने तयारी भइरहेको आयोग स्रोतले जानकारी दिएको छ।