चलचित्र विकास बोर्डका नीति र दीर्घकालीन योजनामा मन्त्रालयको समन्वय आवश्यक : सचिव अर्याल

काठमाडाैं । सञ्चार तथा सूचना प्रविधि मन्त्रालयकी सचिव राधिका अर्यालले चलचित्र उद्योग मुलुकको अर्थतन्त्र र पहिचानसँग प्रत्यक्ष रूपमा जोडिएको क्षेत्र भएको उल्लेख गर्दै चलचित्र विकास बोर्डका नीति, कार्यक्रम र दीर्घकालीन योजनामा मन्त्रालयसँगको समन्वय आवश्यक रहेको बताएकी छन्।

बिहीबार सिंहदरबारमा बसेको राष्ट्रिय सभाको विधायन व्यवस्थापन समितिको बैठकमा चलचित्र विधेयकमाथि दफावार छलफलका क्रममा उठेका प्रश्नहरूको जवाफ दिँदै सचिव अर्यालले बोर्डलाई कार्यक्षेत्रका हिसाबले पूर्ण स्वायत्तता दिइए पनि दीर्घकालीन योजना, वार्षिक कार्यक्रम र बजेट स्वीकृतिका विषयमा मन्त्रालयसँग सहकार्य अपरिहार्य रहेको स्पष्ट पारिन्।

उनले चलचित्रले इतिहास र कथा मात्र नभई मुलुकको आर्थिक समृद्धिको सारथी बन्न सक्ने भूमिका निर्वाह गर्नुपर्नेमा समेत जोड दिइन्।

बैठकमा उपस्थित सांसदहरूले ऐतिहासिक तथा सांस्कृतिक सम्पदा झल्काउने चलचित्रलाई प्राथमिकता दिनुपर्ने धारणा व्यक्त गरेका थिए।