साहित्यकार मोतीशोभा श्रेष्ठका तीन भाषाका पाँच कृति एकैसाथ विमोचन

काठमाडौँ । साहित्यकार मोतीशोभा श्रेष्ठद्वारा लिखित नेपाली, नेपाल भाषा र अङ्ग्रेजी भाषाका पाँच कृति आज एकैसाथ विमोचन गरिएको छ ।

पूर्वअर्थमन्त्री शङ्कर कोइराला, नेपाल सरकारका पूर्वमुख्यसचिव डा बिमल कोइराला तथा वरिष्ठ साहित्यकार एवं पत्रकार श्रीओम श्रेष्ठ ‘रोदन’ले संयुक्त रूपमा ती कृतिको विमोचन गरे ।

पूर्वसहसचिवसमेत रहेकी श्रेष्ठका नेपाली भाषाका ‘सपनाको उडान’ कथासङ्ग्रह र ‘यात्राको वेगः अनुभूतिको संवेग’ नियात्रासङ्ग्रह, नेपाल भाषाका ‘रङ्गीचङ्गी स्वांनं छाय्पियातःगु क्यब’ र ‘तक्यंगु सुका’ तथा अङ्ग्रेजी भाषाको ‘मदर हु नेम्ड मी सत्य’ पुस्तक विमोचन गरिएको हो ।

पूर्वअर्थमन्त्री शङ्कर कोइरालाले नेपाली साहित्यको विकासमा श्रेष्ठको योगदान प्रशंसनीय रहेको बताए । उनले राष्ट्रसेवक कर्मचारीले अवकाशपछि पनि साहित्य सिर्जनामार्फत समाज र साहित्य क्षेत्रमा योगदान पुर्‍याउनु सकारात्मक भएको उल्लेख गरे ।

कार्यक्रममा पूर्वमुख्यसचिव डा कोइरालाले श्रेष्ठ निरन्तर सिर्जनामा सक्रिय साहित्यकार भएको उल्लेख गर्दै उनका कृतिमा विविध विधा र अनुभव समेटिएको बताए । ‘सपनाको उडान’ कथासङ्ग्रहमा कथासँगै निबन्धात्मक अनुभूति पनि समेटिएको उनको भनाइ थियो ।

वरिष्ठ साहित्यकार एवं पत्रकार श्रीओम श्रेष्ठ ‘रोदन’ले श्रेष्ठका पाँचवटै कृतिमा सरलता र इमानदारिता झल्किएको बताए । अवकाशपछि आठ दशकको उमेरमा समेत साहित्य सिर्जनालाई निरन्तरता दिँदै १७ कृति प्रकाशन गर्नु उल्लेखनीय उपलब्धि भएको उनको भनाइ थियो ।

लेखक श्रेष्ठले ‘सपनाको उडान’ कथासङ्ग्रहमा समाजका विकृति र विसङ्गतिलाई विषयवस्तु बनाइएको जानकारी दिइन् । ‘यात्राको वेगः अनुभूतिको संवेग’ नियात्रामा सरकारी सेवामा रहँदा विभिन्न देशको भ्रमणका क्रममा प्राप्त अनुभव समेटिएको उनले बताइन् ।

कार्यक्रममा साहित्यकार ज्ञानेन्द्र विवशले श्रेष्ठका कृतिमा माटोप्रतिको अगाध प्रेम अभिव्यक्त भएको बताए भने साहित्यकार भागीरथी श्रेष्ठले उनको कथासङ्ग्रहमा सरल र मिठासपूर्ण भाषाशैली रहेको उल्लेख गरिन् ।

प्राडा सविना श्रेष्ठले कोरोना महामारीको समयदेखि नेपाली साहित्यमा निरन्तर कलम चलाउँदै आएकी मोतीशोभाका हालसम्म १७ कृति प्रकाशित भएको जानकारी दिइन् । उनका अनुसार श्रेष्ठका नेपाली भाषामा १०, नेपाल भाषामा चार र अङ्ग्रेजी भाषामा तीन कृति प्रकाशित छन् ।

प्राडा सिर्जना श्रेष्ठले साहित्य सिर्जनामा इमानदारिता आवश्यक हुने र त्यो गुण मोतीशोभाका कृतिमा पाइने बताइन् । सो अवसरमा नेपाल भाषा फाउण्डेसनले लेखक श्रेष्ठलाई सम्मान गरेको थियो । फाउण्डेशनका अध्यक्ष मङ्गलमान शाक्यले उनलाई सम्मान गरेका थिए ।