मुस्ताङमा आजदेखि ‘घरपझोङ जलवायु सम्मेलन २०८३’ शुरू हुँदै

काठमाडाैं । मुस्ताङमा मंगलबारदेखि ‘घरपझोङ जलवायु सम्मेलन २०८३’ शुरु हुँदैछ।

सम्मेलनको मंगलबार कृषि वन तथा पर्यावरणमन्त्री गीता चौधरीले उद्घाटन गर्ने कार्यक्रम रहेकाे हाे । सम्मेलनमा भाग लिन ४ सय २१ स्थानीय तह र ३६ जिल्ला समन्वय समितिका जनप्रतिनिधि सोमबार साँझ मुस्ताङमा पुगिसकेका छन् । सोमबार साँझसम्म सातै प्रदेशका महानगर, उपमहानगर, नगर र गाउँपालिकाका जनप्रतिनिधिसहित दुई हजार भन्दा बढी अतिथि मुस्ताङ पुगेको घरपझोङ गाउँपालिकाले जनाएकाे हाे ।

सम्मेलनको व्यवस्थापनका लागि पालिकाअन्तर्गतका पाँचै वडाका गाउँ समाज, आमा समूह, युवा क्लब र अन्य संघसस्थालाई परिचालन गरिएको गाउँपालिका उपाध्यक्ष जमुना थकालीले बताउनुभयाे। सम्मेलनस्थलभित्र २८ फिट उचाइको जलवायु परिवर्तनको असर सम्बन्धी जनचेतना झल्काउने पृथ्वी रोइरहेको बेलुनको गोलाकार आकृति राखिएको छ ।

मुस्ताङका कृषि उत्पादनको प्रचारप्रसार गर्ने उद्देश्यका साथ पचासभन्दा बढी स्टल राखिएको गाउँपालिकाले जनाएकाे हाे। दुई दिनसम्म संचालन हुने सम्मेलनले जलवायु परिवर्तनको असर सम्वन्धी घोषणापत्र जारी गर्ने भएकाे छ।