देशभर भिटामिन ‘ए’ र जुकाको औषधि अभियान सुरु, २२ लाखभन्दा बढी बालबालिका लाभान्वित हुने

काठमाडौं। सरकारले आइतबार र सोमबार देशभरका बालबालिकालाई भिटामिन ‘ए’ र जुकाको औषधि खुवाउने अभियान सुरु गरेको छ। स्वास्थ्य तथा जनसङ्ख्या मन्त्रालय अन्तर्गत सञ्चालन गरिएको राष्ट्रिय भिटामिन ‘ए’ कार्यक्रममार्फत दुई दिनसम्म औषधि वितरण गरिने भएको हो।

स्वास्थ्य सेवा विभाग का अनुसार ६ महिनादेखि ५९ महिनासम्मका झण्डै २२ लाख बालबालिकालाई भिटामिन ‘ए’ क्याप्सुल खुवाइनेछ। साथै, १ वर्षदेखि ५ वर्षमुनिका करिब २० लाख बालबालिकालाई जुकाको औषधि अलबेन्डाजोल पनि खुवाइँदैछ।

कार्यक्रमका लागि देशभरका पालिकाहरूले पायक पर्ने स्थानमा खोप केन्द्र स्थापना गरेका छन्। अभियान सफल बनाउन करिब ५२ हजार महिला स्वास्थ्य स्वयंसेविका र १५ हजार स्वास्थ्यकर्मी परिचालन गरिएको छ।

चिकित्सकहरूका अनुसार भिटामिन ‘ए’ ले बालबालिकाको रोग प्रतिरोधात्मक क्षमता बढाउन र शारीरिक वृद्धि विकासमा महत्वपूर्ण भूमिका खेल्छ। त्यस्तै, जुकाको औषधिले पेटका किरा हटाएर कुपोषण, रगतको कमी, पेट दुख्ने तथा झाडापखाला जस्ता समस्याबाट जोगाउन मद्दत गर्छ।

नेपालमा हरेक वर्ष कात्तिक र वैशाख महिनामा यस कार्यक्रम अन्तर्गत बालबालिकालाई निःशुल्क रूपमा भिटामिन ‘ए’ र जुकाको औषधि खुवाउने गरिन्छ।