ओली पक्राउविरुद्ध झापामा विरोध, एमालेले आकस्मिक बैठक बोलायो

झापा — नेकपा (एमाले)का अध्यक्ष तथा पूर्वप्रधानमन्त्री केपी शर्मा ओली पक्राउपछि उनको गृह जिल्ला झापामा कडा विरोध सुरु भएको छ।

एमाले झापाका अध्यक्ष प्रेम गिरी ले सामाजिक सञ्जालमार्फत पक्राउप्रति आपत्ति जनाउँदै यसलाई राजनीतिक प्रतिशोधको संज्ञा दिएका छन्। उनले टिप्पणी गर्दै यस्तो कदमले लोकतन्त्रलाई असर पार्ने संकेत गरेका छन्।

यसैबीच नेकपा (एमाले) झापाले आज बिहान ११ बजे पार्टीका विभिन्न तहका पदाधिकारीलाई आकस्मिक बैठकका लागि बोलाएको छ। बैठकमा ओलीको पक्राउपछि उत्पन्न परिस्थितिबारे रणनीति तय गरिने तथा आगामी आन्दोलनका कार्यक्रम घोषणा हुन सक्ने बताइएको छ।

ओली पक्राउ प्रकरणले राष्ट्रिय राजनीति तातेको बेला झापामा सुरु भएको विरोधले थप राजनीतिक तरंग ल्याउने देखिएको छ।