144
Shares
काठमाडौं । निर्वाचन आयोगले यही फागुन २१ गते हुने प्रतिनिधिसभा सदस्य निर्वाचनका दिन देशभर मौसम सफा रहने जनाएको छ।
आयोगले जल तथा मौसम विज्ञान विभागको जानकारी उद्धृत गर्दै मतदानका दिन मौसम अनुकूल रहने बताएको हो। शुक्रबार आयोजित पत्रकार सम्मेलनमा आयोगका प्रवक्ता नारायणप्रसाद भट्टराईले निर्वाचनको दिन मौसमको प्रभावबारे आम चासो रहेकाले विभागसँग निरन्तर समन्वय भइरहेको जानकारी दिए।
विभागका महानिर्देशकसँगको छलफलपछि आयोगले मतदानको दिन देशभर मौसम सफा रहने निष्कर्ष निकालेको जनाएको छ। विगत ३० वर्षको तथ्यांकमा आधारित पूर्वानुमानलाई परिमार्जन गर्दै विभागले हाल एक हप्तासम्मको यथार्थपरक मौसम पूर्वानुमान सार्वजनिक गर्दै आएको छ।
हाल देशका विभिन्न भागमा विशेषगरी सङ्खुवासभा लगायतका हिमाली जिल्लामा छिटपुट हिमपात भइरहेको भए पनि यसले मतदान प्रक्रियामा अवरोध नपुर्याउने आयोगको निष्कर्ष छ। संयुक्त निर्वाचन सञ्चालन केन्द्र (JEOC) मार्फत दिनभर मौसमसम्बन्धी अद्यावधिक जानकारी लिइरहेको पनि प्रवक्ता भट्टराईले बताए।
जमेको हिउँमाथि थपिएको नयाँ हिउँले मतदान केन्द्रसम्म पुग्न मतदातालाई खासै समस्या नपार्ने आकलन गरिएको छ। आयोगले मौसमको अवस्थालाई नजिकबाट निगरानी गरिरहेको र आकस्मिक परिवर्तन आए आवश्यक तयारी गरिने जनाएको छ।
फेसबुकबाट तपाईको प्रतिक्रिया