निर्वाचन आयोगद्वारा उम्मेदवार र परिवारको बैंक खातामा निगरानी

काठमाडौं । निर्वाचन आयोगले प्रतिनिधि सभा सदस्य निर्वाचनका उम्मेदवारका एकाघरका परिवारको बैंक खातामा निगरानी सुरु गरेको छ।

निर्वाचनसम्बन्धी सम्पूर्ण खर्च बैंकिङ प्रणालीमार्फत गर्न भन्दै आयोगले राजनीतिक दल र उम्मेदवारलाई पटक–पटक ध्यानाकर्षण गराए पनि अधिकांश उम्मेदवारले बैंकिङ कारोबार बाहिरबाट खर्च गरेको पाइएको जनाएको छ। त्यसपछि आयोगले परिवारसहितको बैंक खाताको कारोबारमा निगरानी बढाएको हो।

चुनावी खर्च पारदर्शी बनाउन आयोगले आचारसंहितामै बैंक खातामार्फत मात्र खर्च गर्नुपर्ने व्यवस्था गरेको थियो। तर उक्त प्रावधानको पालना नभएपछि प्रचारप्रसार अवधिमा उम्मेदवार र उनका परिवारका सदस्यहरूको बैंक खाताको कारोबार अनुगमनमा राखिएको आयोगले जनाएको छ।

शुक्रबार सञ्चारकर्मीसँग कुरा गर्दै केन्द्रीय निर्वाचन आचारसंहिता तथा अनुगमन समितिका संयोजक समेत रहेका आयुक्त सगुन शमशेर जबराले बैंक खातामार्फत निर्वाचन खर्च नगर्ने उम्मेदवारलाई आचारसंहिता उल्लंघनको आधारमा प्रचलित कानुनअनुसार कारबाही गरिने बताए।

उम्मेदवारको चुनावी खर्चको अनुगमन जिल्लास्थित कोष तथा लेखा नियन्त्रण कार्यालयबाट भइरहेको पनि उनले जानकारी दिए।

आयुक्त जबराले आचारसंहिताको पूर्ण पालना गरी निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न सबै पक्षलाई सहयोग गर्न आग्रह गरेका छन्।