173
Shares
काठमाडौं । सरकारी स्वामित्वको राष्ट्रिय वाणिज्य बैंकले चालु आर्थिक वर्षको पहिलो ६ महिनासम्म निष्क्रिय कर्जा (NPL) ४ दशमलव ५५ प्रतिशत रहेको जनाएको छ भने बैंकले १ अर्ब ७५ करोड रुपैयाँ नाफा कमाएको छ।
योजना सम्पन्न भइरहेको अपरिस्कृत विवरण अनुसार, बैंकको ६१औँ वार्षिकोत्सवका अवसरमा शनिबार आयोजित कार्यक्रममा सञ्चालक समितिका अध्यक्ष देवकुमार ढकालले उत्पादनशील क्षेत्रलाई प्राथमिकतामा राखेर कर्जा प्रवाह भइरहेको जानकारी दिए। उनले पुँजीबजार, निर्माण, सेवा, लगानी प्रवर्द्धन र विकास निर्माण जस्ता क्षेत्रमा सकारात्मक सङ्केत देखिएकाले अर्थतन्त्रमा आशा उत्पन्न भएको उल्लेख गरे।
बैकका प्रमुख कार्यकारी अधिकृत देवेन्द्ररमण खनालले नयाँ सोच र सङ्कल्पका साथ वित्तीय सेवा प्रवाह जारी रहेको बताए। कर्जा प्रवाह बढाउनु चुनौती भएको स्वीकार्दै उनले बैंकको पुँजीलाई सुदृढ बनाउन तीन खर्ब बराबरको ऋणपत्र (बन्ड) निष्कासनको तयारी रहेको जानकारी दिए।
हाल बैंकसँग कर्जा–निक्षेप अनुपातका आधारमा १ खर्ब ७१ अर्ब तथा तरलता आधारमा १ खर्ब ३९ अर्ब रुपैयाँ लगानीयोग्य रकम छ। तर पुँजी पर्याप्त नहुँदा बैंकले थप मात्र १८ अर्ब रुपैयाँकै कर्जा प्रवाह गर्न सक्ने अवस्थामा छ।
बैंकले निक्षेपतर्फ ४७ लाख ४३ हजार भन्दा बढी ग्राहकलाई र कर्जा तर्फ २ लाख २६ हजार भन्दा बढी ग्राहकलाई सेवा दिँदै आएको छ। चुक्ता पुँजी १५ अर्ब ६३ करोड रहेको बैंकले पहिलो ६ महिनामा कुल निक्षेप ५ खर्ब ५३ अर्ब संकलन तथा १९ अर्ब बराबर कर्जा प्रवाह गरेको छ।
फेसबुकबाट तपाईको प्रतिक्रिया