उम्मेदवारी फिर्ता लिने आज अन्तिम दिन, दिउँसोसम्म नाम फिर्ता गर्न सकिने

काठमाडौं । निर्वाचन आयोगले प्रतिनिधिसभा सदस्य निर्वाचनका लागि उम्मेदवारी दिएका उम्मेदवारले शुक्रबार दिउँसो १ बजेसम्म नाम फिर्ता लिन सक्ने जनाएको छ।

आयोगका अनुसार निर्वाचन कार्यतालिका बमोजिम शुक्रबार बिहान १० बजेदेखि दिउँसो १ बजेसम्म उम्मेदवारी फिर्ता लिने समय तोकिएको छ। त्यसैगरी, दिउँसो १ देखि ३ बजेसम्म उम्मेदवारको अन्तिम नामावली प्रकाशन गरिनेछ। आयोगले शुक्रबार अपराह्न ४ बजेदेखि साँझ ७ बजेसम्म उम्मेदवारलाई निर्वाचन चिह्न प्रदान गरिने जानकारी दिएको छ।

पहिलो हुने निर्वाचित हुने प्रणालीअन्तर्गतको निर्वाचन कार्यक्रमअनुसार माघ ७ गते दाबी–विरोधमा उजुरी दिने अवधि तोकिएको थियो। सो दिन बिहान १० बजेदेखि दिउँसो ३ बजेसम्म उजुरी दर्ता गर्ने समय तोकिएको थियो भने त्यसपछि दिउँसो ३ बजेदेखि बिहीबार साँझ ५ बजेसम्म मनोनयन पत्र तथा उजुरीउपर जाँचबुझ गरी उम्मेदवारको नामावली प्रकाशन गरिएको आयोगले जनाएको छ।

आयोगका अनुसार देशभरका १ सय ६५ निर्वाचन क्षेत्रबाट कुल तीन हजार ४ सय ८६ उम्मेदवारी दर्ता भएका छन्। माघ ६ गते देशभर एकैपटक मनोनयन पत्र दर्ता सम्पन्न भएको हो। कुल उम्मेदवारमध्ये तीन हजार ८९ जना पुरुष, तीन सय ९६ जना महिला र एक जना अन्य रहेको निर्वाचन आयोगले जनाएको छ।