सिन्धुलीमा नेपाल एसबीआई बैंकबाट ३ करोड बढी रकम लुटियो

काठमाडौं । काभ्रेको बनेपाबाट गएको लुटेरा समूहले सिन्धुलीको घ्याङ्लेखस्थित नेपाल एसबीआई बैंकबाट ३ करोड बढी रकम लुटेको छ ।

जिल्ला प्रहरी कार्यालय सिन्धुलीका अनुसार, मंगलबार राति लुटेराहरूले ३ करोड १० लाख ९५ हजार रुपैयाँ लुटपाट गरेका थिए । लुटेराहरूले बैंकका सुरक्षागार्डलाई कुटपिट गरी सेफमा रहेको रकम लुटेको प्रहरी स्रोतले जानकारी दिएको छ ।

घटना लगत्तै प्रहरीले खोजतलास गर्दा नजिकैको जंगलबाट १ करोड ८० लाख १० हजार ५ सय रुपैयाँ बरामद गर्न सफल भएको छ ।

प्रहरीले लुटेराहरूले प्रयोग गरेको टाटा सुमो र त्यसका चालकलाई नियन्त्रणमा लिएको छ । चालक बनेपाकै रहेको र सबै लुटेरा पनि बनेपाबाट आएका थिए । अन्य लुटेराको खोजी कार्य जारी रहेको प्रहरीले जनाएको छ ।