काठमाडौं उपत्यकाको तापक्रम ३ डिग्रीमा झर्‍यो

काठमाडौं । आज काठमाडौं उपत्यकाको न्यूनतम तापक्रम ३ डिग्री सेल्सियससम्म मापन भएको छ ।

आज बिहान ६ बजेर २७ मिनेटमा ललितपुरस्थित सानेपामा ३ डिग्री सेल्सियस न्यूनतम तापक्रम मापन गरिएको मौसमविद् उज्वल उपाध्यायले जानकारी दिनुभएको छ । उहाँका अनुसार तापक्रम अझै घट्न सक्ने अनुमान गरिएको छ ।

तापक्रम घटेसँगै उपत्यकामा जाडोको महसुस पनि बढेको छ । आजको न्यूनतम तापक्रमको अन्तिम मापन बिहान ८ बजेर ४५ मिनेटमा गरिने मौसमविद् उपाध्यायले बताउनुभयो ।

यसैबीच आज तराई भू–भागका केही स्थानहरूमा हुस्सु तथा कुहिरो लागेको छ ।

मौसम पूर्वानुमान महाशाखाका अनुसार कोशी र गण्डकी प्रदेशका उच्च पहाडी तथा हिमाली भू–भागमा आंशिक बदली रहनेछ भने बाँकी भू–भागमा मौसम मुख्यतया सफा रहने अनुमान गरिएको छ ।