कांग्रेस विशेष महाधिवेशनको उद्घाटन सत्र भृकुटीमण्डपमा जारी

काठमाडौँ । नेपाली कांग्रेसको विशेष महाधिवेशनको उद्घाटन सत्र काठमाडौँको भृकुटीमण्डपमा जारी छ ।

महाधिवेशनस्थलको मूल गेट नजिकै रहेको स्टलबाट प्रतिनिधिहरूको नाम दर्ता गर्ने काम भइरहेको विशेष महाधिवेशन व्यवस्थापन सचिवालयका संयोजक मनोजमणि आचार्यले जानकारी दिएका छन् ।

उनका अनुसार नाम दर्ता शुल्क एक हजार रुपैयाँ तोकिएको छ । महाधिवेशनस्थल पुगेका प्रतिनिधिहरूले नाम दर्ता गरी कार्ड लिने क्रम जारी रहेको छ ।

पार्टीका ५४ प्रतिशत महाधिवेशन प्रतिनिधिहरूले हस्ताक्षर गरी पार्टी विधानको धारा १७(२) बमोजिम विशेष महाधिवेशनको माग गरेका थिए । सोही मागअनुसार महामन्त्रीद्वय गगन थापा र विश्वप्रकाश शर्माले विशेष महाधिवेशन आह्वान गरेका हुन् ।

यद्यपि संस्थापन पक्षले विशेष महाधिवेशनलाई अस्वीकार गरेको छ । महाधिवेशन सोमबारसम्म सञ्चालन हुने जनाइएको छ ।