दक्षिण कोरियासँग तनाव चुलिँदा उत्तर कोरियाले सीमाभरि लाउडस्पिकर बजाउने

दक्षिण कोरियासँगको सीमा विवाद चर्किएपछि उत्तर कोरियाले दुई देशबीचको सीमाभरि दक्षिण कोरियालाई लक्षित प्रचार प्रसारण गर्ने लाउडस्पिकर पुनः सञ्चालन गर्ने घोषणा गरेको छ ।

उत्तर कोरियाली नेता किम जोङ उनकी बहिनी किम यो जोङले अक्टोबर महिनाभित्र सीमाका सबै क्षेत्रमा लाउडस्पिकर सञ्चालनमा ल्याइने बताएकी हुन् । किम यो जोङले दक्षिण कोरियाली सेनाले उत्तर कोरियाली सैनिकलाई लक्षित गरी चेतावनी प्रसारण गरेको र चेतावनीस्वरूप गोली चलाएको आरोप लगाएकी छन् । उनले उत्तर कोरियाको कदमलाई त्यसको जवाफका रूपमा प्रस्तुत गर्दै सीमा क्षेत्रमा आफ्ना सैनिक एकाइहरू नयाँ स्थानमा परिचालन भइरहेको पनि बताएकी छन् ।

तर दक्षिण कोरियाले आफ्ना सैनिकले सीमाको सुरक्षा र सम्भावित अतिक्रमण रोक्न रक्षात्मक कदम चालेको जनाएको छ । दुई देशबीचको तनाव बढ्नुमा सीमा क्षेत्रमा सैनिक गतिविधि, बार निर्माण तथा बारुदी सुरुङ विस्फोटका घटनाले पनि भूमिका खेलेका छन् । सेप्टेम्बर २१ मा सीमा क्षेत्रमा भएको बारुदी सुरुङ विस्फोटमा तीन दक्षिण कोरियाली सैनिक घाइते भएका थिए । दक्षिण कोरियाले त्यसका लागि उत्तर कोरियालाई जिम्मेवार ठहर गरे पनि उत्तर कोरियाले आरोप अस्वीकार गरेको छ ।

दक्षिण कोरियाले सन् २०२५ मा उत्तरतर्फ लक्षित प्रचार प्रसारण बन्द गर्दै स्थायी लाउडस्पिकर हटाएको थियो । उत्तर कोरियाको पछिल्लो घोषणाले दुई देशबीच तनाव कम गर्ने प्रयासमा थप चुनौती सिर्जना गरेको छ ।