विचौलियाहरूले प्रहरी हेडक्वार्टर कब्जा गरेको रास्वपाका सांसद सुनारकाे आरोप

काठमाडौं । राष्ट्रिय स्वतन्त्र पार्टी (रास्वपा) का सांसद खगेन्द्र सुनारले विचौलियाहरूले प्रहरी हेडक्वार्टर कब्जा गरेको आरोप लगाउनुभएकाे छ।

प्रतिनिधि सभाको सार्वजनिक लेखा समितिमा यसअघि प्रहरी अधिकारीहरूसँग सवाल जवाफ गरेका सांसद सुनार बिहीबार पनि बैठकमा त्यही प्रसंग उठाएर यस्ताे आरोप लगाउनुभएकाे हाे। उहाँले प्रहरीको स्रोत साधन खरिदको विषयमा भएको जानकारी अहिलेसम्म आयो कि आएन भनेर प्रश्न गर्नुभएकाे छ । उहाँले अघिल्लो बैठकमा आफूले गरेकाप्रश्नहरूमा अहिले पनि दृढ रहेको उल्लेख गर्दै कसैलाई मानमर्दन भएको लागे अदालतमा गएर मुद्दा हाल्न चुनौती दिनुभयाे ।

समितिको गत बैठकमा सांसद सुनारको अभिव्यक्ति र शैलीप्रति बाहिर पनि निकै आलोचना भएको थियो । यो विषयमा सभामुखले समेत चासो लिएर समितिका सभापति सचिव र प्रहरी महानिरीक्षकसँग पनि छलफल गर्नुभएकाे थियाे। रास्वपाले सांसदहरूका प्रस्तुती शैलीमा मर्यादा कायम गर्न निर्देशन पनि दिएको छ।