घट्याे फेरि सुनचाँदीको मूल्य

काठमाडाैं । नेपाली बजारमा आइतबार फेरि सुनचाँदीको मूल्य घटेको छ।

गत शुक्रबार तोलामा एक सय रूपैयाँले घटेको सुनको मूल्य आइतबार प्रतितोला दुई हजार आठ सय रूपैयाँले घटेको हो। नेपाल सुनचाँदी व्यवसायी महासंघले आइतबार सुन प्रतितोला दुई लाख ९० हजार ९ सय रूपैयाँमा किनबेच भइरहेको जनाएकाे छ। शुक्रबार सुन प्रतितोला दुई लाख ९३ हजार सात सय रूपैयाँमा कारोबार भएको थियो।

त्यस्तै, आइतबार चाँदीको मूल्य पनि घटेको छ। चाँदी शुक्रबार प्रतितोला पाँच हजार एक सय १५ रूपैयाँमा कारोबार भएको थियाे । तर आइतबार चाँदी तोलामा पाँच हजार १० रूपैयाँमा किनबेच भइरहेको छ। यो मूल्य शुक्रबारको तुलनामा आइतबार चाँदी प्रतितोला एक सय पाँच रूपैयाँले घटेको हो।

अन्तर्राष्ट्रिय बजारमा आइतबार सुन प्रतिऔंस चार हजार पाँच सय १० अमेरिकी डलरमा कारोबार भइरहेको महासंघले जनाएकाे छ।