देशभर गर्मी बढ्दो, सोमबार–मंगलबार झनै तातो हुने चेतावनी

काठमाडाैं उपत्यकासहित देशैभरी केही दिन यता गर्मी उल्लेखनीय रूपमा बढेको छ। मौसम पूर्वानुमान महाशाखाले सोमबार र मंगलबार अझै तापक्रम बढ्ने जनाएको छ।

मधेश प्रदेशलगायत बागमती, गण्डकी, लुम्बिनी र सुदूरपश्चिम प्रदेशका तराई भू-भागमा तातो दिन रहनेछ भने लुम्बिनी र सुदूरपश्चिमका पश्चिमी तराई क्षेत्रमा तातो लहर (Heatwave) चल्ने सम्भावना रहेको छ। महाशाखाले सर्वसाधारणलाई सतर्क रहन आग्रह गरेको छ।

आइतबार नेपालगञ्ज र दिपायल मा तापक्रम ४० डिग्री सेल्सियस पुगेको थियो, जसले अत्यधिक गर्मीको संकेत गर्दछ।

यता, उच्च पहाडी तथा हिमाली क्षेत्रमा भने वर्षा भइरहेको छ। कास्की मा ५७.४ मिमी र सिन्धुपाल्चोक मा ६८.४ मिमी वर्षा रेकर्ड गरिएको छ। गोरखा, लमजुङ, सोलुखुम्बु, खोटाङ, धनकुटा र सङ्खुवासभामा मध्यम वर्षा भएको छ भने अन्य स्थानमा हल्का वर्षा भएको छ।

यसैबीच, चितवन र तनहुँ लगायतका क्षेत्रमा असिना समेत परेको छ।