सिन्धुलीमा बीपी राजमार्गमा सवारी दुर्घटना, ९ जना घाइते

सिन्धुली । सुनकोशी गाउँपालिका–५ साईटारस्थित बीपी राजमार्गमा शुक्रबार भएको सवारी दुर्घटनामा ९ जना यात्रु घाइते भएका छन्।

काठमाडौंबाट काँकडभित्तातर्फ जाँदै गरेको बा ४ ख ५०५२ नम्बरको माइक्रो बस र विपरीत दिशाबाट काठमाडौंतर्फ जाँदै गरेको बागमती प्रदेश ०१–००६ ख २२९७ नम्बरको बस ठोक्किँदा दुर्घटना भएको जिल्ला प्रहरी कार्यालय सिन्धुलीका प्रमुख लालध्वज सुवेदीले जानकारी दिनुभयो।

घाइतेमध्ये माइक्रो बस चालक गजबहादुर मगर, काभ्रे मण्डनदेउपुर–९ की ३० वर्षीया अनिता न्यौपाने, ३२ वर्षीय प्रबिन तिवारीलाई टाउको चोट लागेपछि धुलिखेल अस्पतालमा उपचारका लागि पठाइएको छ। ठेगाना नखुलेका प्रशान्त केसीको अनुहार र खुट्टामा गम्भीर चोट लागेको छ।

अन्य घाइतेहरूको उपचार आत्मीय सामुदायिक अस्पताल खाल्टेमा भइरहेको छ। घाइतेमध्ये अधिकांशलाई सामान्यदेखि मध्यम खालका चोट लागेको चिकित्सकहरूले बताएका छन्।

घाइतेहरूमा झापाका संस्कृति यादव, कल्पना राई, अमेश खड्का, अमृत राना मगर र दिनप्रसाद सिग्देल रहेका छन्।