कपिलवस्तुमा निषेधाज्ञाबारे आज सर्वदलीय बैठक बस्दै

काठमाडौं । कपिलवस्तुमा शनिबारदेखि लागू गरिएको निषेधाज्ञाबारे थप निर्णय लिन आज बिहान सर्वदलीय बैठक बस्ने भएको छ ।

जिल्ला प्रशासन कार्यालय कपिलवस्तुका अनुसार शनिबार दिउँसो २ बजेदेखि लागू गरिएको निषेधाज्ञा हालसम्म कायम रहेको छ । सहायक प्रमुख जिल्ला अधिकारी भविश्वर घिमिरेले आइतबार बिहान साढे ८ बजे सर्वदलीय बैठक बसेर अवस्थाको समीक्षा गर्दै आवश्यक निर्णय गरिने जानकारी दिएका छन् ।

उनका अनुसार घटनामा संलग्न केही व्यक्तिलाई पक्राउ गरिएको छ भने आइतबार बिहानैदेखि सुरक्षा व्यवस्था कडा पारिएको छ ।

महाराजगञ्ज नगरपालिका–२ र ३ को सीमाक्षेत्रमा ईद र नवरात्र पर्वका क्रममा उत्पन्न विवाद चर्किँदै गएपछि प्रशासनले अनिश्चितकालीन निषेधाज्ञा जारी गरेको हो । प्रशासनले बर्गदी पुलदेखि बहादुरगञ्ज चोक, महाराजगञ्ज बजार हुँदै हर्दौना क्षेत्रभित्र भेला, सभा, जुलुस तथा प्रदर्शनमा रोक लगाएको छ ।

स्थिति नियन्त्रणमा लिन प्रहरीले ७ राउण्ड अश्रुग्यास प्रहार गरेको थियो । निषेधाज्ञाकाबीच भएको झडपमा ५ जना प्रदर्शनकारी र २ जना प्रहरी घाइते भएका छन् । उनीहरूको उपचार भइरहेको प्रहरीले जनाएको छ ।