समानुपातिक सांसदको नाममा निर्वाचन आयोगले रुजु प्रक्रिया अघि बढायो

काठमाडौं । निर्वाचन आयोगले प्रतिनिधिसभा निर्वाचन अन्तर्गत समानुपातिक प्रणालीतर्फ राजनीतिक दलहरूले पेश गरेका १ सय १० जना उम्मेदवारको नाममा रुजु प्रक्रिया अघि बढाएको छ।

निर्वाचनमा तीन प्रतिशत ‘थ्रेसहोल्ड’ कटाएका ६ वटै राजनीतिक दलले समानुपातिक प्रणालीतर्फ सांसद हुनेको नाम सोमबार आयोगमा बुझाएका थिए। आयोगले ती नाम क्लस्टर, अर्थात् समावेशी समूहअनुसार मिलेको वा नमिलेको रुजु प्रक्रिया अघि बढाएको जनाएको छ।

दलहरूले बुझाएको सूचीमा त्रुटि नभएमा आयोगले सोमबारै निर्वाचित सांसदको सूची सार्वजनिक गर्ने तयारीमा छ। तर सूचीमा केही त्रुटि भेटिएमा सम्बन्धित दललाई मिलाएर फेरि पठाउन समय दिइनेछ।

सार्वजनिक सूचीपछि निर्वाचित सांसदलाई प्रमाणपत्र वितरण गरिनेछ। समानुपातिकतर्फ निर्वाचित सांसदको टुङ्गो लागिसकेपछि आयोगले प्रतिवेदन तयार गरेर राष्ट्रपति रामचन्द्र पौडेलसमक्ष बुझाउनेछ र त्यसपछि नयाँ सरकार गठनको प्रक्रिया सुरु हुनेछ।