काठमाडौंका विभिन्न स्थानमा आज केही समय विद्युत् कटौती

काठमाडौं । नेपाल विद्युत् प्राधिकरणले आज काठमाडौंका विभिन्न स्थानमा केही समय विद्युत् कटौती हुने जनाएको छ।

प्राधिकरणले सूचना जारी गर्दै गोठाटार र बत्तीसपुतली फिडरअन्तर्गतका विभिन्न स्थानमा विद्युत् कटौती हुने जानकारी दिएको हो।

प्राधिकरणको बानेश्वर वितरण केन्द्रको कार्यक्षेत्रमा पर्ने ती दुवै फिडरबाट वितरण हुने पेप्सीकोला, टाउन प्लानिङलगायतका क्षेत्रमा रहेको ११ केभी लाइन मर्मत गर्न लागिएको जनाइएको छ।

जीर्ण अवस्थामा रहेका पोलको मर्मत तथा नयाँ पोल जडान गर्ने कार्यका लागि बिहान ११ बजेदेखि दिउँसो १ः३० बजेसम्म पेप्सीकोला र टाउन प्लानिङ क्षेत्रमा विद्युत् कटौती हुनेछ।

यस्तै, मध्य बानेश्वर, पुरानो बानेश्वर र बत्तीसपुतली क्षेत्रमा भने दिउँसो २ बजेदेखि ४ बजेसम्म विद्युत् कटौती हुने सूचनामा उल्लेख छ।

तोकिएको समयभन्दा अगावै काम सम्पन्न भएमा विद्युत् आपूर्ति नियमित रूपमा सञ्चालन गरिने प्राधिकरणले जनाएको छ। साथै, विद्युत् कटौतीका कारण उपभोक्तामा पर्न सक्ने असुविधाप्रति प्राधिकरणले क्षमा मागेको छ।